Follow the FOURTH PILLAR LIVE channel on WhatsApp
കൊച്ചി: ഏറെ ജനപ്രീതി നേടിയ ഉപ്പും മുളകും പരമ്പരയിലൂടെ ശ്രദ്ധേയനായ സതീഷ് തൻവി സംവിധാനം ചെയ്യുന്ന പുതിയ ചിത്രത്തിന്റെ ചിത്രീകരണം കൊച്ചിയിൽ ആരംഭിച്ചു. നമ്മുടെ ജീവിതത്തിലെ ചില അനുഭവങ്ങൾ അക്ഷേപഹാസ്യത്തിലൂടെ അവതരിപ്പിക്കുകയാണ് പേരിടാത്ത ഈ ചിത്രം.
അൽത്താഫ് സലിം, വാഴ എന്ന ചിത്രത്തിലൂടെ പ്രേക്ഷകർക്കിടയിൽ വലിയ സ്വാധീനമുണ്ടാക്കിയ ജോമോൻ ജ്യോതിർ, അനാർക്കലി മരയ്ക്കാർ എന്നിവർ കേന്ദ്ര കഥാപാത്രങ്ങളെ അവതരിപ്പിക്കുന്ന ഈ ചിത്രം എലമെന്റ്‌സ് ഓഫ് സിനിമയുടെ ബാനറിൽ എം.ശ്രീരാജ് നിർമ്മിക്കുന്നു. അജയ് വാസുദേവ്, ജി.മാർത്താണ്ഡൻ, ഡിക്‌സൻ പൊടുത്താസ് എന്നിവരാണ് എക്‌സിക്കുട്ടീവ് പ്രൊഡ്യൂസർമാർ.
സർക്കാർ ഉദ്യോഗസ്ഥനായ ഒരു യുവാവിന്റെ ജീവിതത്തിലൂടെയാണ് ഈ ചിത്രത്തിന്റെ അവതരണം. പൊതുസമൂഹത്തിൽ നാം ഓരോരുത്തർക്കും ഓരോ പ്രശ്‌നങ്ങളെ അഭിമുഖീകരിക്കേണ്ടി വരുന്നുണ്ട്. എന്നാൽ അവയിൽ പലതിനേയും നാം ഗൗരവമായി കാണാതെ പോകുന്നു. അല്ലങ്കിൽ അവയ്ക്കു നേരെ കണ്ണടയ്ക്കുന്നു. അത്തരമൊരു സാഹചര്യം ഒരു യുവാവിന്റെ ജീവിതത്തിൽ ഉണ്ടാക്കുന്ന താളപ്പിഴകളും അതിനു കാരണമായ വ്യവസ്ഥിതിക്കെതിരേയുള്ള അയാളുടെ പോരാട്ടത്തിന്റെയും കഥയാണ് ഈ സിനിമ.
ചിലപ്പോൾ നിസ്സാരം എന്നും മറുവശം ചിന്തിച്ചാൽ ഗൗരവം എന്നും തോന്നാവുന്ന ഒരു വിഷയം ചിരിയോടെ മാത്രം കണ്ട് ആസ്വദിക്കാവുന്ന രീതിയിലാണ് സിനിമയുടെ സഞ്ചാരം. ആ സഞ്ചാരമാകട്ടെ മറ്റു ചില ജീർണ്ണതകൾക്കെതിരേയുള്ള ചൂണ്ടുവിരലുമാണ്. അസീസ് നെടുമങ്ങാട്, അന്ന പ്രസാദ് തുടങ്ങിയവരും ഏതാനും പുതുമുഖങ്ങളും ഈ ചിത്രത്തിൽ അണിനിരക്കുന്നു.
ഷിഹാബ് കരുനാഗപ്പള്ളിയുടെ കഥയ്ക്ക് ഷിഹാബ്, സർജി വിജയൻ, സംവിധയകൻ സതീഷ് തൻവി എന്നിവർ ചേർന്നു തിരക്കഥ രചിച്ചിരിക്കുന്നു. സംഗീതം -മണികണ്ഠൻ അയ്യപ്പൻ, ഛായാഗ്രഹണം -നിഖിൽ. എസ്.പ്രവീൺ, ചിത്രസംയോജനം -മഹേഷ് ദുവനേന്ദ്, വസ്ത്രാലങ്കാരം -ഡോണ മറിയം ജോസഫ്, ചമയം -സുധി ഗോപിനാഥ്, കലാസംവിധാനം -മധു രാഘവൻ, ചീഫ് അസ്സോസ്സിയേറ്റ് ഡയറക്ടർ -സുമിലാൽ സുബ്രമണ്യൻ, മാർക്കറ്റിങ് -ഹെയ്ൻസ്, പ്രൊഡക്ഷൻ കൺട്രോളർ -സുരേഷ് മിത്രക്കരി.
കൊച്ചിയിലും തിരുവനന്തപുരത്തുമായി ചിത്രീകരണം പൂർത്തിയാകും.
