Follow the FOURTH PILLAR LIVE channel on WhatsApp
രഞ്ജിത്ത് സംവിധാനം ചെയ്യുന്ന ‘ലോ ആൻഡ് ഓർഡർ’ എന്ന ചിത്രത്തിലെ രണ്ടാമത്തെ വീഡിയോ ഗാനം പുറത്തിറങ്ങി. ഗാനത്തിന്റെ സ്റ്റുഡിയോ പതിപ്പിനൊപ്പം ചിത്രത്തിലെ രംഗങ്ങളും കോർത്തിണക്കിയാണ് വീഡിയോ ഒരുക്കിയിരിക്കുന്നത്.
“കായാകും മുൻപ് കൊഴിഞ്ഞൊരു പൂ മണ്ണിനോട് പറഞ്ഞു, ഞാനില്ല… ഞാനില്ലിനി നിൻ സ്വപ്നത്തിന് നേരാവാൻ, ഞാനില്ല ഞാനില്ലിനി നിൻ വേരിന് നീരാവാൻ…” എന്ന വരികളോടെയുള്ള ഗാനമാണ് പുറത്തുവിട്ടത്. ഷിബു ചക്രവർത്തിയുടെ വരികൾക്ക് ജോ ഡാനിയേൽ സംഗീതം പകർന്നിരിക്കുന്നു. ടോജൻ ടോബിയും സംഘവുമാണ് ആലാപനം.
സത്യം സിനിമാസിന്റെയും മഹാ സുബൈർ മൂവിക്ഷേത്രയുടെയും ബാനറിൽ പ്രേമചന്ദ്രൻ എ.ജി., മഹാ സുബൈർ എന്നിവർ ചേർന്നാണ് ചിത്രം നിർമിക്കുന്നത്. സെപ്റ്റംബർ 4ന് ചിത്രം തിയേറ്ററുകളിലെത്തുന്നതിന്റെ ഭാഗമായാണ് പുതിയ വീഡിയോ ഗാനം പുറത്തിറക്കിയത്.
ഗാനത്തിന്റെ റെക്കോർഡിങ് ദൃശ്യങ്ങൾക്കൊപ്പം ചിത്രത്തിലെ വൈകാരിക രംഗങ്ങളും ഉൾപ്പെടുത്തിയിട്ടുണ്ട്. പ്രകാശ് വർമ്മയും അഭിരാമിയുമാണ് ഈ രംഗങ്ങളിൽ പ്രധാനമായും പ്രത്യക്ഷപ്പെടുന്നത്. ചിത്രത്തിന്റെ കഥാഗതിയിലെ നിർണായക സന്ദർഭങ്ങളാണ് വീഡിയോ ഗാനത്തിൽ ഉൾപ്പെടുത്തിയിരിക്കുന്നതെന്നാണ് സൂചന.
‘തുടരും’ എന്ന ചിത്രത്തിലെ ജോർജ് സാർ എന്ന കഥാപാത്രത്തിലൂടെ ശ്രദ്ധ നേടിയ പ്രകാശ് വർമ്മയും സമീപകാല ചിത്രങ്ങളിലൂടെ വീണ്ടും പ്രേക്ഷകശ്രദ്ധ നേടിയ അഭിരാമിയും ‘ലോ ആൻഡ് ഓർഡറി’ൽ കേന്ദ്ര കഥാപാത്രങ്ങളെയാണ് അവതരിപ്പിക്കുന്നത്.
മാസ് ആക്ഷൻ ത്രില്ലർ സ്വഭാവത്തിൽ, യാഥാർഥ്യബോധമുള്ള അവതരണത്തോടെയാണ് ചിത്രം ഒരുക്കുന്നതെന്ന് അണിയറപ്രവർത്തകർ പറയുന്നു. ഒരു മെട്രോ നഗരത്തിന്റെ പശ്ചാത്തലത്തിൽ വികസിക്കുന്ന കഥ തുടക്കം മുതൽ പ്രേക്ഷകനെ ഉദ്വേഗത്തിലാക്കുന്ന രീതിയിലാണ് അവതരിപ്പിക്കുന്നത്. കൊച്ചിയാണ് പ്രധാന ലൊക്കേഷൻ. തിരുവനന്തപുരം, കോട്ടയം, വയനാട്, കണ്ണൂർ, അതിരപ്പിള്ളി എന്നിവിടങ്ങളിലും ചിത്രീകരണം നടന്നു.
ഋതു ദേവ് അയ്യപ്പൻ, ഷനൂദ് ഇബ്രാഹിം, ഡോൺ മൈക്കിൾ, സജൻ സുദർശൻ, നിജാദ് ബാബു തോമസ്, ഷെർഷ ഷെരിഫ്, റിനോഷ് ജോർജ്, അമൽ ജോസ് ആന്റണി, ബോബി കുര്യൻ, വി.കെ.പ്രകാശ്, സുരേഷ് കൃഷ്ണ, ജോയ് മാത്യു, ദേവൻ, ആനന്ദ് മൻമഥൻ, ജോണി ആന്റണി, ഭീമൻ രഘു, നന്ദു, ജെയ്സ് ജോസ്, അസിം ജമാൽ, ഗായത്രി അശോക്, അജയ് വാസുദേവ്, ശങ്കർ രാമകൃഷ്ണൻ, നന്ദൻ ഉണ്ണി, അക്ഷയ് രാധാകൃഷ്ണൻ, മോഹൻ ജോസ്, മാധുരി, സാബുമോൻ, ഗുണ്ടുകാട് സാബു, മുരുകൻ, സന്ധ്യ രാജേന്ദ്രൻ, വൈഷ്ണവി, രമാദേവി, അംബിക നായർ എന്നിവരും ചിത്രത്തിൽ അഭിനയിക്കുന്നു.
മമ്മൂട്ടി തന്റെ ജനപ്രിയ കഥാപാത്രമായ കാരിക്കാമുറി ഷൺമുഖം ആയി ചിത്രത്തിൽ വീണ്ടും എത്തുമെന്ന പ്രചാരണമുണ്ടെങ്കിലും ഇതുസംബന്ധിച്ച് അണിയറപ്രവർത്തകർ ഔദ്യോഗിക സ്ഥിരീകരണം നൽകിയിട്ടില്ല.
ബിജിപാലാണ് പശ്ചാത്തലസംഗീതം. പ്രശാന്ത് രവീന്ദ്രൻ ഛായാഗ്രഹണവും മനോജ് കണ്ണോത്ത് എഡിറ്റിങ്ങും നിർവഹിക്കുന്നു. സാബു റാം കലാസംവിധാനവും റോഷൻ എൻ.ജി. മേക്കപ്പും സമീറ സനീഷ് വസ്ത്രാലങ്കാരവും നിർവഹിക്കുന്നു. പ്രേംലാൽ പട്ടാഴിയാണ് സ്റ്റിൽസ്. കിഷൻ സപ്ത ശബ്ദസംവിധാനവും സുനിൽ സിങ് ലൈൻ പ്രൊഡക്ഷനും നിർവഹിക്കുന്നു.
വി.ബോസ് ചീഫ് അസോസിയേറ്റ് ഡയറക്ടറാണ്. ആന്റണി സ്റ്റീഫനാണ് ഡിസൈൻ. ശാലിനി കാസ്റ്റിങ് ഡയറക്ടർ. ഫീനിക്സ് പ്രഭു, പി.സി. സ്റ്റണ്ട്സ്, മാഫിയ ശശി എന്നിവരാണ് സംഘട്ടനം ഒരുക്കുന്നത്. പ്രസാദ് നമ്പ്യാങ്കാവ് പ്രൊഡക്ഷൻ എക്സിക്യൂട്ടീവും പ്രശാന്ത് നാരായണൻ പ്രൊഡക്ഷൻ കൺട്രോളറുമാണ്. പി.ആർ.ഒ. വാഴൂർ ജോസ്.
സത്യം സിനിമാസ് ചിത്രം പ്രദർശനത്തിനെത്തിക്കും.
