Follow the FOURTH PILLAR LIVE channel on WhatsApp
തിരുവനന്തപുരം: ഏറെ ചർച്ച ചെയ്യപ്പെടുകയും, മികച്ച വിജയം നേടുകയും ചെയ്ത തിങ്കളാഴ്ച്ച നിശ്ചയം എന്ന ചിത്രത്തിലെ കേന്ദ്ര കഥാപാത്രത്തെ അവതരിപ്പിച്ച് പ്രശംസ നേടിയ കെ.യു.മനോജ് കേന്ദ്രകഥാപാത്രത്തെ അവതരിപ്പിക്കുന്ന ചിത്രമാണ് പുഞ്ചിരി മുറ്റത്ത് ഇട്ടിക്കോര. പാപ്പച്ചൻ ഒളിവിലാണ് എന്ന ചിത്രത്തിലൂടെ ശ്രദ്ധേയനായ സിന്റോ സണ്ണിയാണ് ഈ ചിത്രം സംവിധാനം ചെയ്യുന്നത്. ബെൻഹർ ഫിലിംസിന്റെ ബാനറിൽ മാനുവൽ ബിജു നിർമ്മിക്കുന്ന ഈ ചിത്രത്തിന്റെ ചിത്രീകരണം നവംബർ ആറിന് തൃപ്പൂണിത്തുറ പേട്ടയിൽ ആരംഭിക്കും.
അണുകുടുംബ സംസ്‌കാരത്തിലേക്കു കടന്ന മനുഷ്യ ജീവിതം തികച്ചും സ്വാർത്ഥമായി. താനും തന്റെ കുടുംബവുമായി ഒതുങ്ങുക എന്ന രീതി. നഗരജീവിതത്തിലാണ് ഇത് ഏറ്റവും കൂടുതൽ പ്രകടമാകുന്നത്. സമൂഹവുമായി യാതൊരു ബന്ധവും ഇക്കൂട്ടർക്കില്ല. അയൽവാസികളാരെന്നോ എന്തു ചെയ്യുന്നുവെന്നോ എന്നൊന്നും അറിയുന്നില്ല. ബന്ധങ്ങളും സൗഹൃദങ്ങളും അകലുന്നു. അവർ സ്വയം സൃഷ്ടിച്ച വേലിക്കെട്ടുകളിൽ ഒതുങ്ങുന്നു. ഇത്തരക്കാരുടെ ഇടയിലേക്ക് അപ്രതീക്ഷിതമായി ഒരാൾ കടന്നു വരുന്നു -പുഞ്ചിരി മുറ്റത്ത് ഇട്ടിക്കോര.
ഈ നാട്ടിലെ ജനങ്ങളുമായി ഇട്ടിക്കോര പിന്നിട് ഇഴുകിച്ചേരുന്നു. ഇതിലൂടെ നാട്ടുകാർക്കിടയിൽ ഉണ്ടാകുന്ന അത്ഭുതകരമായ മാറ്റങ്ങളാണ് പൂർണ്ണമായും നർമ്മമുഹൂർത്തങ്ങളിലൂടെ അവതരിപ്പിക്കുന്നത്. ഗൗരവമായ ഒരു വിഷയം നർമ്മത്തിലൂടെ പറയുകയാണ് ഈ ചിത്രത്തിലൂടെ. നമ്മുടെ നഗര ജീവിതത്തിന്റെ ഒരു നേർക്കാഴ്ച്ച എന്ന് ഈ ചിത്രത്തെക്കുറിച്ചു പറയാം.
ഹന്നാ റെജി കോശിയാണു നായിക രജനീകാന്ത് ചിത്രമായ വേട്ടയാനിൽ മുഖ്യ വേഷമണിഞ്ഞ തൻമയ സോൾ ഈ ചിത്രത്തിൽ പ്രധാനപ്പെട്ട ഒരു കഥാപാത്രത്തെ അവതരിപ്പിക്കുന്നു. ജാഫർ ഇടുക്കി, ജയിംസ് എല്യാ, വിനീത് തട്ടിൽ, പ്രമോദ് വെളിയനാട്, സജിൻ ചെറുകയിൽ, കലാഭവൻ റഹ്‌മാൻ, ശ്രുതി ജയൻ, ശ്രീധന്യ, ആർട്ടിസ്റ്റ് കുട്ടപ്പൻ, മനോഹരിയമ്മ, പൗളി വത്സൻ, ഷിനു ശ്യാമളൻ, ജസ്‌നിയാ കെ.ജയദീഷ്, തുഷാര, അരുൺ സോൾ, പ്രിയാ കോഴിക്കോട് എന്നിവരും പ്രധാന വേഷങ്ങളിലെത്തുന്നു.
ബിജു ആന്റണിയുടേതാണ് കഥയും തിരക്കഥയും സംഭാഷണവും. സംഗീതം -ശങ്കർ ശർമ്മ, ഛായാഗ്രഹണം -റോജോ തോമസ്, ചിത്രസംയോജനം -അരുൺ ആർ.എസ്., കലാസംവിധാനം -സൂരജ് കുറവിലങ്ങാട്, ചമയം -മനോജ്കിരൺ രാജ്, വസ്ത്രാലങ്കാരം -സുജിത് മട്ടന്നൂർ, ക്രിയേറ്റീവ് കോൺട്രിബ്യൂട്ടർ -മജു രാമൻ, പ്രൊഡക്ഷൻ കൺട്രോളർ സഫി ആയൂർ.
