29 C
Trivandrum
Thursday, April 3, 2025

ബ്രസീലിനെ മുക്കിയ അർജൻ്റീന ലോകകപ്പിന്; ജയം 4-1ന്

Follow the FOURTH PILLAR LIVE channel on WhatsApp 

ബ്യൂണസ് ഐറിസ്: ചിരവൈരികളായ ബ്രസീലിനെ 1-4ന് തകർത്ത് ലോക ചാമ്പ്യന്മാരായ അർജൻ്റീന 2026 ലോകകപ്പിന് യോഗ്യത ഉറപ്പാക്കി. ആദ്യപകുതിൽ ജൂലിയൻ അൽവാരസ് (4), എൻസോ ഫെർണാണ്ടസ് (12), അലക്‌സിസ് മക്അലിസ്റ്റർ (37) എന്നിവരും രണ്ടാം പകുതിയിൽ ജൂലിയാനോ സിമിയോണിയും (71) ആതിഥേയർക്കു വേണ്ടി ഗോളുകൾ നേടിയപ്പോൾ ബ്രസീലിൻ്റെ ആശ്വാസ ഗോൾ നേടിയത് മത്തേയസ് കുഞ്ഞയാണ് (26).

ബൊളീവിയയും യുറുഗ്വേയും തമ്മിലുള്ള മത്സരം സമനിലയിൽ കലാശിച്ചതിനാൽ ബ്രസീലിനെതിരായ മത്സരത്തിനു മുമ്പുതന്നെ ലാറ്റിനമേരിക്കൻ മേഖലയിൽ നിന്ന് 2026 ലോകകപ്പിന് യോഗ്യതയുറപ്പിക്കുന്ന ആദ്യ ടീമായി അർജൻ്റീന മാറിയിരുന്നു. എന്നാൽ, അർജൻ്റീനയോട് തോറ്റതോടെ ബ്രസീലിന് യോഗ്യതയ്ക്ക് ഇനിയും കാത്തിരിക്കണം.

സൂപ്പർ താരങ്ങളായ ലയണൽ മെസിയും നെയ്മറും കളിക്കാതിരുന്ന മത്സരത്തിൻ്റെ തുടക്കം മുതൽ തന്നെ അർജൻ്റീനയുടെ ആധിപത്യമായിരുന്നു. പന്ത് കാലിൽ സൂക്ഷിച്ച് എതിരാളികളുടെ ക്ഷമകെടുത്തിയ അവർ 4ാം മിനിറ്റിൽ തന്നെ മുന്നിലെത്തി. ബ്രസീലിൻ്റെ പരിചയക്കുറവുള്ള പ്രതിരോധത്തെ കീഴടക്കി ജൂലിയൻ അൽവാരസ് ആണ് ഗോളടിച്ചത് (1-0).

8ാം മിനിറ്റിൽ മധ്യനിര താരം എൻസോ ഫെർണാണ്ടസ് ലീഡുയർത്തി. ഇത്തവണയും ബ്രസീൽ പ്രതിരോധത്തിൻ്റെ പിഴവാണ് ഗോളിൽ കലാശിച്ചത്. വലതുഭാഗത്തു നിന്നുള്ള പാസ് ക്ലിയർ ചെയ്യുന്നതിൽ ഡിഫൻഡർക്ക് പിഴച്ചപ്പോൾ പന്തെത്തിയത് ഓടിക്കയറിയ എൻസോയുടെ മുന്നിലേക്ക്. പന്ത് നിലത്തിറങ്ങും മുമ്പ് പോസ്റ്റിലേക്കയച്ച് താരം രണ്ടാം ഗോളും നേടി (2-0).

26-ാം മിനുട്ടിൽ അർജൻ്റീന ഡിഫൻ്റർ ക്രിസ്റ്റിയൻ റൊമേറോയുടെ കാലിൽ നിന്ന് പന്ത് റാഞ്ചി മത്തേയസ് കുഞ്ഞ ഒരു ഗോൾ മടക്കിയത് ബ്രസീലിന് പുത്തനുണർവ് പകർന്നു (2-1). അതുവരെ വലിയ നീക്കങ്ങൾ നടത്താതിരുന്ന അവർ ഉണർന്നു കളിക്കാൻ തുടങ്ങി. എന്നാൽ പ്രതിരോധ മികവിൽ അർജൻ്റീന എതിരാളികൾക്ക് അവസരങ്ങൾ നൽകിയില്ല. 32-ാം മിനുട്ടിൽ എൻസോ ഫെർണാണ്ടസ് ബോക്‌സിലേക്ക് ഉയർത്തി നൽകിയ പന്ത് ഗോൾകീപ്പറുടെ തൊട്ടുമുന്നിൽ നിന്ന് ഗോളിലേക്കയച്ച് മക്അലിസ്റ്റർ 2 ഗോൾ ലീഡ് തിരിച്ചുപിടിച്ചു (3-1).

രണ്ടാം പകുതിയിൽ ബ്രസീൽ ഭേദപ്പെട്ട ആക്രമണ മനോഭാവം കാണിച്ചെങ്കിലും അർജൻ്റീനയുടെ പരിചയസമ്പത്തിനു മുന്നിൽ പിടിച്ചു നിൽക്കാൻ കഴിഞ്ഞില്ല. പകരക്കാരനായി ഇറങ്ങിയ ജൂലിയാനോ സിമിയോണി 71ാം മിനുട്ടിൽ സീറോ ആംഗിളിൽ നിന്നുള്ള തകർപ്പൻ ഗോൾ നേടിയതോടെ ബ്രസീലിൻ്റെ അവശേഷിച്ച പ്രതീക്ഷകളും അസ്ഥാനത്തായി (4-1).

31 പോയിൻ്റുമായി ഒന്നാം സ്ഥാനക്കാരായാണ് അർജൻ്റീന തെക്കേ അമേരിക്കൻ യോഗ്യതാ റൗണ്ടിൽ നിന്ന് നേരിട്ട് ലോകകപ്പ് യോഗ്യത നേടിയത്. 14 കളികളിൽ 5ാം തോൽവി വഴങ്ങിയ ബ്രസീൽ 21 പോയിൻ്റുമായി 4ാം സ്ഥാനത്തേക്ക് വീണു. 23 പോയിൻ്റുമായി ഇക്വഡോറാണ് 2ാമത്. 21 പോയിൻ്റുമായി യുറുഗ്വേ 3ാമതുണ്ട്.

Recent Articles

Related Articles

Special

Enable Notifications OK No thanks