‘എന്റെ രാജ്യം, എന്റെ നാണയം, അതിൽ എന്റെ മുഖം’

Follow the FOURTH PILLAR LIVE channel on WhatsApp 

അമേരിക്കയ്ക്ക് 250 വയസാകുകയാണ്. ജോർജ് വാഷിങ്ടൺ മുതൽ എബ്രഹാം ലിങ്കൺ വരെ ഓർക്കാം. സ്വാതന്ത്ര്യപ്രഖ്യാപനം ഓർക്കാം. ഭരണഘടന ഓർക്കാം. ജനാധിപത്യത്തിന്റെ രണ്ടര നൂറ്റാണ്ട് ഓർക്കാം. പക്ഷേ അമേരിക്കൻ ഭരണകൂടം ആലോചിച്ചപ്പോൾ ഒരു സംശയവും ഉണ്ടായില്ലെന്ന് തോന്നുന്നു. ഇത്ര വലിയൊരു ആഘോഷത്തിന് നാണയത്തിൽ ആരുടെ മുഖം വേണം? ഉത്തരം: ഡോണൾഡ് ജെ.ട്രംപ്.

അങ്ങനെ അമേരിക്കയുടെ 250ാം സ്വാതന്ത്ര്യവാർഷികാഘോഷത്തിനായി യു.എസ്. മിന്റ് പുറത്തിറക്കിയ പ്രത്യേക ഒരുഡോളർ നാണയത്തിന്റെ തലവശത്ത് പ്രസിഡന്റ് ട്രംപ് എത്തി. മറുവശത്ത് അമേരിക്കയുടെ പ്രസിഡൻഷ്യൽ സീൽ. മുകളിൽ ‘LIBERTY’, കൂടെ ‘IN GOD WE TRUST’, താഴെ ‘1776 ~ 2026’.

സ്വാതന്ത്ര്യം മുകളിൽ. ട്രംപ് നടുവിൽ. ദൈവവിശ്വാസം അരികിൽ. ചരിത്രം താഴെ. നാണയത്തിന്റെ മുഴുവൻ രാഷ്ട്രീയവും ഒരു ഫ്രെയിമിൽ!

ഹെഡ്സോ ടെയിൽസോ? ഹെഡ്സ് തീർച്ചയായും ട്രംപ്

നാണയം കൈയിലെടുത്ത് പഴയ രീതിയിൽ ‘ഹെഡ്സ് ഓർ ടെയിൽസ്?’ എന്ന് ചോദിച്ചാൽ ഇനി പ്രത്യേകിച്ച് വിശദീകരിക്കേണ്ടതില്ല. ഹെഡ്സ് എന്നുവച്ചാൽ ട്രംപ് തന്നെ. ടെയിൽസിൽ അമേരിക്ക. അമേരിക്കൻ രാഷ്ട്രത്തിന്റെ 250 വർഷത്തെ ചരിത്രത്തെ ഇത്ര ലളിതമായി രണ്ട് വശങ്ങളാക്കി വിഭജിക്കാൻ മുമ്പ് ആരും ചിന്തിച്ചിട്ടുണ്ടാകില്ല.

മുന്നിൽ പ്രസിഡന്റ്. പിന്നിൽ രാജ്യം. ഇത് രാഷ്ട്രീയവിമർശനം അല്ല. നാണയത്തിന്റെ രൂപകല്പനയാണ്. യു.എസ്. മിന്റ് ചീഫ് എൻഗ്രേവർ ജോസഫ് മെനയാണ് ട്രംപിന്റെ ഔദ്യോഗിക വൈറ്റ് ഹൗസ് ചിത്രത്തെ അടിസ്ഥാനമാക്കി മുഖം രൂപകല്പന ചെയ്തത്. മറുവശത്ത് കഴുകൻ, ഒലിവുശാഖ, അമ്പുകൾ, ‘E PLURIBUS UNUM’, കൂടെ 250 എന്ന അടയാളം. അതായത് നാണയം പറയുന്നത് ലളിതം: 250 വർഷം അമേരിക്ക. ഇപ്പോൾ മുഖം ട്രംപ്.

ഇത് സ്വർണനാണയമല്ല; സ്വർണനിറമാണ്

ട്രംപിന്റെ മുഖമുള്ള നാണയം കണ്ടാൽ സ്വർണമാണെന്ന് തെറ്റിദ്ധരിക്കരുത്. സ്വർണനിറം മാത്രമാണ്. യു.എസ്. മിന്റിന്റെ കണക്കുപ്രകാരം നാണയത്തിൽ 6 ശതമാനം സിങ്ക്, 3.5 ശതമാനം മാംഗനീസ്, 2 ശതമാനം നിക്കൽ; ശേഷിക്കുന്നത് ചെമ്പ്. ഭാരം 8.10 ഗ്രാം. ഇവിടെപ്പോലും ഒരു ചെറിയ ട്രംപ് തത്ത്വമുണ്ട്. കാണുമ്പോൾ സ്വർണം. പരിശോധിച്ചാൽ ചെമ്പ്. രാഷ്ട്രീയവ്യാഖ്യാനം വായനക്കാരന്റെ ഉത്തരവാദിത്വം.

അതേസമയം മറ്റൊരു 24 കാരറ്റ് സ്വർണ സ്മാരകനാണയവും ട്രംപിനെ ആസ്പദമാക്കി പരിഗണിക്കുകയും അതിന്റെ രൂപകല്പനയ്ക്ക് യു.എസ്. കമ്മിഷൻ ഓഫ് ഫൈൻ ആർട്സ് മാർച്ചിൽ അനുമതി നൽകുകയും ചെയ്തിട്ടുണ്ട്. അതിൽ പ്രസിഡന്റിനെ മേശയ്ക്കരികിൽ നിൽക്കുന്ന നിലയിലാണ് അവതരിപ്പിച്ചിരിക്കുന്നത്. കമ്മിഷൻ രേഖകളിൽ രൂപകല്പന ‘പ്രസിഡന്റ് ഡോണൾഡ് ജെ.ട്രംപിന്റെ താൽപര്യങ്ങൾക്ക് അനുസൃതം’ എന്നുപോലും രേഖപ്പെടുത്തിയിട്ടുണ്ട്. അതിനാൽ ഒരു നാണയത്തിൽ മുഖം പോരെന്ന ആശങ്ക വേണ്ട. മുഖത്തിന് ഇനിയും അവസരങ്ങളുണ്ട്.

1 ഡോളറിന് വില 2 ഡോളറിലധികം!

നാണയത്തിന്റെ യഥാർഥ തമാശ വിലയിലാണ്. ഇത് ഒരു $1 coin ആണ്. പക്ഷേ 25 നാണയങ്ങളുടെ ഒരു റോൾ വാങ്ങാൻ 61 ഡോളർ വേണം. അത് അർത്ഥമാക്കുന്നത് മുഖവില 25 ഡോളർ; വാങ്ങാൻ 61. ഒരു ഡോളർ നാണയത്തിന് ഏകദേശം 2.44 ഡോളർ. 100 നാണയങ്ങളുടെ ബാഗിന് 154.50 ഡോളർ.

അതായത് അമേരിക്കൻ ദേശസ്നേഹത്തിന്റെ പുതിയ സാമ്പത്തികശാസ്ത്രം ഒരു ഡോളർ കൈയിൽ കിട്ടാൻ ഒരു ഡോളർ കൊടുത്താൽ പോരാ. ട്രംപിന്റെ മുഖം കൂടി വേണമെങ്കിൽ അധികം കൊടുക്കണം. ഇതിൽ ആരും വഞ്ചിക്കപ്പെടുന്നില്ല. സർക്കാർ തന്നെയാണ് വില പറഞ്ഞ് വിൽക്കുന്നത്.

നാണയം നിയമപരമായി 1 ഡോളർ തന്നെയാണ്. കടയിൽ കൊടുത്താൽ സിദ്ധാന്തത്തിൽ 1 ഡോളറിന്റെ വില. പക്ഷേ മിന്റിൽനിന്ന് വാങ്ങുമ്പോൾ കളക്ടർ ഉല്പന്നത്തിന്റെ വില വേറെ. നാണയം നിയമപരമായ പണമാണെങ്കിലും വ്യാപാരസ്ഥാപനങ്ങൾ അത് സ്വീകരിക്കണമെന്ന് നിർബന്ധമില്ലെന്നും റിപ്പോർട്ടുകളുണ്ട്.

അതിനാൽ 61 ഡോളർ കൊടുത്ത് വാങ്ങിയ 25 ട്രംപുകളുമായി കടയിൽ ചെന്നാൽ കിട്ടുന്നത് 25 ഡോളറിന്റെ സാധനം. ബാക്കി 36 ഡോളർ? ചരിത്രാനുഭവം.

ഭാഗ്യമുണ്ടെങ്കിൽ ജൂലൈ 4ന്റെ ട്രംപ് കിട്ടും

ഇവിടെയും ഒരു ലോട്ടറി സ്വഭാവമുണ്ട്. ജൂലൈ 4ന് ഫിലഡൽഫിയ മിന്റിൽ പ്രത്യേകമായി അടിച്ച 2.5 ലക്ഷം നാണയങ്ങളിൽ ‘July 4th’ അടയാളമുണ്ട്. ഇവ സാധാരണ റോളുകളിലും ബാഗുകളിലും ക്രമരഹിതമായി ചേർത്തിട്ടുണ്ട്. വാങ്ങുമ്പോൾ കിട്ടിയാൽ ഭാഗ്യം.

അതായത് കുട്ടിക്കാലത്തെ മിഠായിപ്പൊതിയിലെ സമ്മാനം പോലെയാണ്. റോൾ തുറക്കുക. ട്രംപ്. അടുത്തത് ട്രംപ്. വീണ്ടും ട്രംപ്. പെട്ടെന്ന് ഒരു ട്രംപിൽ ജൂലൈ 4 അടയാളം! അമേരിക്കൻ സ്വാതന്ത്ര്യത്തിന്റെ 250-ാം വാർഷികത്തിൽ സ്വാതന്ത്ര്യം കണ്ടെത്തുന്നതിലും അപൂർവ നാണയം കണ്ടെത്താനുള്ള ആവേശം കൂടുതൽ.

നിയമം ചോദിക്കുന്നു: ജീവിച്ചിരിക്കുന്ന ആളെ നാണയത്തിലാക്കാമോ?

ഇവിടെ കഥ അല്പം ഗൗരവമുള്ളതാകുന്നു. അമേരിക്കൻ കറൻസിയിൽ ജീവിച്ചിരിക്കുന്ന വ്യക്തികളുടെ ചിത്രം ഉപയോഗിക്കുന്നതിനെതിരേ ദീർഘകാല നിയമപരവും ഭരണപരവുമായ നിയന്ത്രണങ്ങളുണ്ട്. 1866ലെ നിയമം ജീവിച്ചിരിക്കുന്ന വ്യക്തിയുടെ ചിത്രം പേപ്പർ കറൻസിയിൽ ഉപയോഗിക്കുന്നത് തടയുന്നു. അതേ സമയം 2020ൽ കോൺഗ്രസ് പാസാക്കിയ 250ാം വാർഷിക നാണയനിയമത്തിലും ജീവിച്ചിരിക്കുന്ന വ്യക്തിയെ ചിത്രീകരിക്കുന്ന രൂപകല്പനയ്‌ക്കെതിരെ വ്യവസ്ഥയുണ്ട്.

അപ്പോൾ ട്രംപ് എങ്ങനെ വന്നു? ട്രഷറി സെക്രട്ടറി സ്കോട്ട് ബെസന്റിന്റെ മറുപടി ചരിത്രത്തിൽനിന്നാണ്. 1926ൽ അമേരിക്കയുടെ 150ാം വാർഷിക നാണയത്തിൽ അന്നത്തെ പ്രസിഡന്റ് കാൽവിൻ കൂളിഡ്ജ് ജീവനോടെ ഇരിക്കുമ്പോൾ തന്നെ പ്രത്യക്ഷപ്പെട്ടിരുന്നു. അതുകൊണ്ട് ട്രംപിനും സാധിക്കുമെന്നാണ് സർക്കാരിന്റെ വാദം.

അങ്ങനെ നിയമത്തിന്റെ ഒരു ഭാഗത്ത് ‘ജീവിച്ചിരിക്കുന്ന ആളെ വേണ്ട’ എന്നു വായിക്കുമ്പോൾ മറുവശത്ത് ചരിത്രം പറയുന്നു: “പണ്ടൊരിക്കൽ ചെയ്തിട്ടുണ്ട്.” നിയമവിദഗ്ധർക്ക് ചർച്ച ചെയ്യാം. ട്രംപിന് നാണയം ഇതിനകം കിട്ടി.

ഏറ്റവും മനോഹരമായ ഭാഗം: അനുമതി കൊടുത്തത് ആരാണ്?

ഇനി ഈ കഥയുടെ സ്വർണ—ക്ഷമിക്കണം, മാംഗനീസ്-ബ്രാസ്—നിമിഷത്തിലേക്ക് വരാം. നാണയത്തിന്റെ രൂപകല്പന യു.എസ്. കമ്മിഷൻ ഓഫ് ഫൈൻ ആർട്സ് പരിശോധിച്ചു. ആ കമ്മിഷനിലെ നിലവിലെ 7 അംഗങ്ങളും ആരുടെ നിയമനം? ഡോണൾഡ് ട്രംപിന്റെ. 2026 ജനുവരിയിലാണ് ട്രംപ് 7 അംഗങ്ങളെയും 4 വർഷ കാലാവധിക്ക് നിയമിച്ചത്. കമ്മിഷന്റെ ഔദ്യോഗിക രേഖകൾ തന്നെ അത് പറയുന്നു.

ആദ്യം പദ്ധതിയിട്ടത് ഇതിലും ‘ട്രംപാ’യിരുന്നു

ഇപ്പോഴത്തെ നാണയത്തിന്റെ മറുവശത്ത് പ്രസിഡൻഷ്യൽ സീലാണുള്ളത്. അതൊരു താരതമ്യേന ശാന്തമായ രൂപകല്പനയാണ്. പക്ഷേ ആദ്യ കരട് അതിലും ആവേശകരമായിരുന്നു. നാണയത്തിന്റെ ഒരു വശത്ത് ട്രംപിന്റെ മുഖം. മറുവശത്ത് വീണ്ടും ട്രംപ്!

2024ലെ വധശ്രമത്തിനു പിന്നാലെ മുഷ്ടി ഉയർത്തിനിൽക്കുന്ന ട്രംപിന്റെ ചിത്രം, കൂടെ “Fight, Fight, Fight” എന്ന വാചകം ഉപയോഗിക്കുന്ന രൂപകല്പനയാണ് ആദ്യം മുന്നോട്ടുവന്നത്. പിന്നീട് അത് ഒഴിവാക്കി പ്രസിഡൻഷ്യൽ സീലാക്കി. അത് നടന്നിരുന്നെങ്കിൽ ‘ഹെഡ്സ് ഓർ ടെയിൽസ്’ എന്ന കളി തന്നെ അവസാനിച്ചേനേ. ഹെഡ്സ് — ട്രംപ്. ടെയിൽസ് — ട്രംപ്. നാണയം എങ്ങനെ വീണാലും പ്രസിഡന്റ് ജയിക്കും. അമേരിക്കൻ തെരഞ്ഞെടുപ്പ് സംവിധാനത്തിന് ഇതിലും ലളിതമായ മാതൃക കണ്ടെത്താനാകില്ല.

ട്രംപിനും അമ്പരപ്പ്: ‘ഇത് അസാധാരണമല്ലേ?’

നാണയത്തെക്കുറിച്ച് ട്രംപിന്റെ പ്രതികരണവും അദ്ദേഹത്തിന്റെ ശൈലിക്ക് യോജിച്ചത് തന്നെ. തനിക്ക് ഇതിലൂടെ ആദരം ലഭിച്ചതായി അദ്ദേഹം പറഞ്ഞു. ഇത്തരമൊരു കാര്യം അസാധാരണമാണെന്നാണ് തന്റെ അറിവെന്നും ഫോക്സ് ബിസിനസിനോട് പ്രതികരിച്ചു.

അദ്ദേഹം പറഞ്ഞത് ശരിയാണ്. നിലവിലുള്ള പ്രസിഡന്റ് തന്നെ രാജ്യത്തിന്റെ പണത്തിൽ പ്രത്യക്ഷപ്പെടുന്നത് തീർച്ചയായും അസാധാരണമാണ്. അതിലും അസാധാരണമായത്, ആ പ്രസിഡന്റ് നിയമിച്ച സമിതി രൂപകല്പന അംഗീകരിക്കുന്നത്. അതിലും അസാധാരണം, ജീവിച്ചിരിക്കുന്ന വ്യക്തിയെ ഒഴിവാക്കണമെന്ന് പറയുന്ന നിയമത്തെക്കുറിച്ച് ചർച്ച നടക്കുന്നതിനിടയിൽ നാണയം വിപണിയിലെത്തുന്നത്. എന്നിട്ടും ഏറ്റവും സ്വാഭാവികമായി തോന്നുന്ന കാര്യം ഇതെല്ലാം ട്രംപിനെ ചുറ്റിപ്പറ്റിയാണ് നടക്കുന്നത്.

1776 മുതൽ 2026 വരെ; നടുവിൽ ആരൊക്കെ ഉണ്ടായിരുന്നു?

നാണയത്തിൽ 1776–2026 എന്ന് എഴുതിയിട്ടുണ്ട്. അത് 250 വർഷത്തെ അമേരിക്കൻ ചരിത്രത്തെ പ്രതിനിധീകരിക്കുന്നു. ഈ 250 വർഷത്തിനിടെ വാഷിങ്ടൺ ഉണ്ടായിരുന്നു. ജെഫേഴ്സൺ ഉണ്ടായിരുന്നു. ലിങ്കൺ ഉണ്ടായിരുന്നു. ഫ്രാങ്ക്ലിൻ റൂസ്‌വെൽറ്റ് ഉണ്ടായിരുന്നു. മാർട്ടിൻ ലൂഥർ കിങ് ജൂനിയറിന്റെ പോരാട്ടമുണ്ടായിരുന്നു. അടിമത്തം അവസാനിപ്പിച്ച ചരിത്രമുണ്ട്. സ്ത്രീകൾക്ക് വോട്ടവകാശം നേടിയ പോരാട്ടമുണ്ട്. പൗരാവകാശ സമരങ്ങളുണ്ട്. ചന്ദ്രനിലെത്തിയ കഥയുണ്ട്. യുദ്ധവും സമാധാനവും സാമ്പത്തികമാന്ദ്യവും ശാസ്ത്രവിപ്ലവവുമുണ്ട്. അതെല്ലാം ഒറ്റവരിയിൽ 1776–2026. അതിന്റെ മുകളിൽ വലിയൊരു മുഖം. ട്രംപ്. ആ മുഖമാണ് അമേരിക്കയുടെ 250 വർഷത്തെ ‘past, present and future’ പ്രതിനിധീകരിക്കുന്ന രൂപകല്പനയെന്ന് യു.എസ്. മിന്റ് ഡയറക്ടർ വിശേഷിപ്പിച്ചു. ചരിത്രപുസ്തകം എഴുതേണ്ട പണി ഒരു നാണയത്തിൽ തീർന്നു.

‘LIBERTY’യും മുഖവും

നാണയത്തിലെ ഏറ്റവും മികച്ച ദൃശ്യപരിഹാസം ഒരുപക്ഷേ ‘LIBERTY’ എന്ന വാക്കായിരിക്കും. ട്രംപിന്റെ തലയ്ക്കു മുകളിൽ വലിയ അക്ഷരങ്ങളിൽ സ്വാതന്ത്ര്യം. ഇത് കാണുമ്പോൾ അർത്ഥശാസ്ത്രം പഠിച്ചവന് ഒരു ചിന്ത. രാഷ്ട്രീയം പഠിച്ചവന് മറ്റൊരു ചിന്ത. കലാവിമർശകനു മൂന്നാമത്തെ ചിന്ത. ട്രംപ് ആരാധകന് നാലാമത്തെ. ട്രോളർമാർക്ക്? മാസങ്ങളോളം ഉള്ളടക്കം.

പ്രസിഡന്റുമാർ സാധാരണയായി ചരിത്രമാകാൻ കാത്തിരിക്കും

പഴയ രാഷ്ട്രീയത്തിൽ ഒരു അനൗപചാരിക രീതിയുണ്ടായിരുന്നു. രാജ്യത്തെ ഭരിക്കുക. പദവി ഒഴിയുക. ചരിത്രം വിലയിരുത്തട്ടെ. വർഷങ്ങൾ കടക്കട്ടെ. പിന്നീട് പ്രതിമയോ സ്മാരകമോ തപാൽസ്റ്റാമ്പോ നാണയമോ വരാം. ട്രംപ് മോഡൽ കുറച്ചുകൂടി കാര്യക്ഷമമാണ്. ചരിത്രത്തിന്റെ വിധിക്കായി എന്തിന് കാത്തിരിക്കണം? ഭരിക്കുമ്പോൾത്തന്നെ ചരിത്രമാവുക. സ്മാരകം വേണമെങ്കിൽ ഇപ്പോൾ. നാണയം വേണമെങ്കിൽ ഇപ്പോൾ. ചിത്രം വേണമെങ്കിൽ ഇപ്പോൾ. അടുത്ത തലമുറ എന്തുപറയും എന്ന് അടുത്ത തലമുറ നോക്കട്ടെ.

1 ഡോളറിന്റെ രാഷ്ട്രീയമൂല്യം

ഇത് വെറും രസകരമായ ഒരു നാണയകഥയായി തള്ളിക്കളയാനും കഴിയില്ല. രാജ്യത്തിന്റെ ഔദ്യോഗിക ചിഹ്നങ്ങളിൽ ഭരണത്തിലിരിക്കുന്ന വ്യക്തിയുടെ രൂപം എത്രത്തോളം ഇടംപിടിക്കണം എന്നത് ജനാധിപത്യ സംസ്കാരവുമായി ബന്ധപ്പെട്ട ചോദ്യമാണ്. അതുകൊണ്ടാണ് ജീവിച്ചിരിക്കുന്ന നേതാക്കളുടെ ചിത്രങ്ങൾ കറൻസിയിൽ വരുന്നതിനെ അമേരിക്ക ദീർഘകാലം സംശയത്തോടെ കണ്ടത്.

നാണയം വ്യക്തിയെ ആദരിക്കുന്നതാണോ? അല്ലെങ്കിൽ രാഷ്ട്രത്തിന്റെ ചിഹ്നത്തെ വ്യക്തിയുടെ ബ്രാൻഡാക്കി മാറ്റുന്നതാണോ? 250ാം വാർഷികത്തിൽ രാജ്യം തന്നെയാണോ കേന്ദ്രം? അതോ ആ സമയത്ത് വൈറ്റ് ഹൗസിൽ ഇരിക്കുന്ന ആളോ? ഈ ചോദ്യങ്ങൾ വിമർശകർ ഉയർത്തുന്നത് അതുകൊണ്ടാണ്.

അതേസമയം യു.എസ്. മിന്റിന്റെ നിലപാട് വ്യക്തമാണ്: 2026ലെ 250ാം വാർഷിക നാണയപരിപാടിയുടെ ഭാഗമായാണ് ഇത്. ട്രംപ് നാണയം നിയമപരമായ 1 ഡോളർ നാണയമാണ്; മറ്റു വാർഷിക രൂപകല്പനകളോടൊപ്പം തന്നെയാണ് പുറത്തിറക്കിയിരിക്കുന്നത്. വസ്തുത അവിടെ. ട്രോൾ ഇവിടെ.

ഒടുവിൽ ഒരു സംശയം മാത്രം

ഒരു അമേരിക്കക്കാരന്റെ പോക്കറ്റിൽ നാണയം കിടക്കുന്നു. ഈ നാണയത്തേക്കാൾ കൃത്യമായി ഇന്നത്തെ അമേരിക്കൻ രാഷ്ട്രീയത്തെ വിശദീകരിക്കുന്ന ഒരു വസ്തു കണ്ടെത്താൻ ബുദ്ധിമുട്ടായേക്കാം.

1 ഡോളറിന്റെ ഔദ്യോഗിക മൂല്യം. ട്രംപിന്റെ മുഖം. 250 വർഷത്തെ ചരിത്രം. നിയമത്തെച്ചൊല്ലിയുള്ള തർക്കം. തന്നെ നിയമിച്ചവന്റെ ചിത്രം അംഗീകരിച്ച സമിതി. 25 ഡോളറിന്റെ നാണയത്തിന് 61 ഡോളർ വില. അതിൽ ചിലതിൽ പ്രത്യേക ജൂലൈ 4ന്റെ അടയാളം. ഇതെല്ലാം കഴിഞ്ഞിട്ടും പ്രസിഡന്റ് വിനീതമായി പറയുന്നു: “ഇത് അല്പം അസാധാരണമാണല്ലോ.” അതെ, സർ. അതുമാത്രമാണ് ഈ കഥയിൽ ആരും തർക്കിക്കാത്ത വസ്തുത.

അമേരിക്കയ്ക്ക് 250 വയസായി. പക്ഷേ ആഘോഷനാണയം നോക്കിയാൽ ഒരു സംശയം തോന്നും. ജന്മദിനം അമേരിക്കയ്ക്കാണോ, ട്രംപിനാണോ?