Follow the FOURTH PILLAR LIVE channel on WhatsApp
തിരുവനന്തപുരം: പശ്ചിമേഷ്യയിലെ ഏറ്റവും വലിയ ആരോഗ്യ എക്സ്പോയായ അറബ് ഹെല്ത്തില് കേരളത്തിന് പങ്കാളിത്തം. തുടര്ച്ചയായ രണ്ടാം വര്ഷമാണ് അറബ് ഹെല്ത്തില് കേരളം പവലിയന് ഒരുക്കുന്നത്. കേരള സ്റ്റേറ്റ് ഇന്ഡസ്ട്രിയല് ഡെവലപ്മെന്റ് കോര്പ്പറേഷന്റെ (കെ.എസ്.ഐ.ഡി.സി.) നേതൃത്വത്തിലാണ് ഈ പവലിയന്.
കെ.എസ്.ഐ.ഡി.സിക്കു പുറമെ കേരള ലൈഫ് സയന്സസ് ഇന്ഡസ്ട്രീസ് പാര്ക്ക് (കെ.എൽ.ഐ.പി.), കേരള മെഡിക്കല് ടെക്നോളജി കണ്സോര്ഷ്യം (കെ.എം.ടി.സി.) എന്നിവരും അറബ് ഹെല്ത്തില് കേരളത്തില് നിന്നുള്ള പ്രതിനിധി സംഘത്തിൻ്റെ ഭാഗമാണ്.
ദുബായ് വേള്ഡ് ട്രേഡ് സെന്ററില് തിങ്കളാഴ്ച ആരംഭിച്ച 4 ദിവസത്തെ എക്സ്പോയിലെ കെ.എസ്.ഐ.ഡി.സി. പവലിയനില് കേരളത്തില് നിന്നുള്ള 6 കമ്പനികള് പങ്കെടുക്കുന്നുണ്ട്. ലിബര്ട്ടി മെഡ് സപ്ലൈസ്, പ്രിമസ് ഗ്ലൗസ്, ഇക്സൈം മെഡ്ടെക്, ജയോണ് ഇംപ്ലാന്റ്സ്, ഹാരിസണ് കോടി ലൈഫ്കെയര്, ഐ ഓര്ബിറ്റ് ഡിജിറ്റല് ടെക്നോളജീസ് എന്നീ കമ്പനികളാണ് എക്സ്പോയില് കേരളത്തെ പ്രതിനിധീകരിക്കുന്നത്.
പശ്ചിമേഷ്യ, യു.എസ്., യൂറോപ്പ്, ആഫ്രിക്ക, ഏഷ്യ എന്നിവിടങ്ങളില് നിന്നായി 80ലധികം രാജ്യങ്ങള് എക്സ്പോയില് പങ്കെടുക്കുന്നുണ്ട്. 40 ലധികം രാജ്യങ്ങളുടെ പവലിയനുകളും എക്സ്പോയിലുണ്ട്.
