തിരുവനന്തപുരം:: കേരളത്തിലെ ഫുട്ബോള് ആരാധകരെ ആവേശത്തിലാക്കി, അര്‍ജന്റീന ഫുട്ബോള് ടീം കേരളത്തില്‍ പന്ത് തട്ടാനെത്തും. ടീം അടുത്ത വര്‍ഷമാകും കേരളത്തിലെത്തുക. കായിക മന്ത്രി വി.അബ്ദുറഹിമാന്‍ ബുധനാഴ്ച കൂടുതല്‍ വിവരങ്ങള്‍ അറിയിക്കും.
കേരളം സന്ദര്‍ശിക്കുന്നതിന് അര്‍ജന്റീന ഫുട്ബോള് അസോസിയേഷന്റെ അനുമതി ലഭിച്ചതായാണ് സൂചന. മെസ്സി കളിക്കാനെത്തുമോ എന്ന കാര്യത്തില്‍ വ്യക്തത വന്നിട്ടില്ല. മെസ്സിയുടെ കാര്യത്തില്‍ അര്‍ജന്റീന ഫുട്ബോള് അസോസിയേഷനാകും അന്തിമ തീരുമാനം എടുക്കുക.
മത്സര നടത്തിപ്പിനായി ഭീമമായ തുക ആവശ്യം വരും. 100 കോടിയിലധികം ചെലവ് വരുമെന്നാണ് കണക്കാക്കുന്നത്. ഇത് സ്പോണ്‍സര്‍ വഴി കണ്ടെത്തും. കേരളത്തില്‍ രണ്ട് മത്സരങ്ങളാകും ടീം കളിക്കുക. ഏഷ്യയിലെ പ്രമുഖ രണ്ട് ടീമുകളാകും അര്‍ജന്റീനയുമായി കളിക്കുക.
നേരത്തേ സെപ്റ്റംബറില്‍ സ്പെയിനിലെത്തി മന്ത്രിയും സംഘവും അര്‍ജന്റീന ഫുട്ബോള് അസോസിയേഷനുമായി കൂടിക്കാഴ്ച നടത്തിയിരുന്നു. അതേസമയം ടീം വരുന്ന സമയവും വേദിയും പിന്നീട് തീരുമാനിക്കുമെന്നായിരുന്നു അന്ന് അറിയിച്ചിരുന്നത്.
കേരളത്തില്‍ ഫുട്ബോള് അക്കാദമി ആരംഭിക്കുന്നതിനും സൗഹൃദ മത്സരത്തിനും അര്‍ജന്റീനന്‍ ഫുട്ബോള് അക്കാദമി സന്നദ്ധത അറിയിച്ചിട്ടുണ്ടെന്നും വി.അബ്ദുറഹിമാന്‍ അന്ന് പറഞ്ഞിരുന്നു. മത്സരം നടത്തുന്ന വേദിയുടെ കാര്യത്തിലും തീരുമാനമായിട്ടില്ല. വേദി തീരുമാനിക്കപ്പെട്ടാല്‍ അര്‍ജന്റീനന്‍ ഫുട്ബോള് അധികൃതര്‍ എത്തി ഗ്രൗണ്ട് പരിശോധിക്കും.
