ഒരു മുഖം, പല ഭാവങ്ങൾ; ‘മായൻ’ പുതിയ ലുക്ക്

ജയസൂര്യയെ കേന്ദ്രകഥാപാത്രമാക്കി ജിതിൻ കെ.ജോസ് സംവിധാനം ചെയ്യുന്ന ‘മായൻ’ എന്ന ചിത്രത്തിന്റെ പുതിയ ലുക്ക് പോസ്റ്റർ പുറത്തിറങ്ങി. പൊലീസ് യൂണിഫോമിലുള്ള ജയസൂര്യയെ വ്യത്യസ്ത ഭാവങ്ങളിൽ അവതരിപ്പിച്ചാണ് പോസ്റ്റർ ഒരുക്കിയിരിക്കുന്നത്. ചിത്രത്തിന്റെ ടീസർ ഉടൻ പുറത്തിറങ്ങുമെന്ന പ്രഖ്യാപനവും ഇതോടൊപ്പമുണ്ട്.

മാജിക് മൂണിന്റെ ബാനറിൽ രാജീവ് ഗോവിന്ദൻ നിർമിക്കുന്ന ചിത്രത്തിന്റെ ഷൂട്ടിങ് പൂർത്തിയായി. പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്. ഡിസംബർ മൂന്നിന് ചിത്രം തിയേറ്ററുകളിലെത്തും.

ഓരോ ഘട്ടത്തിലും വ്യത്യസ്തമായ ലുക്കുകളാണ് ‘മായൻ’ അണിയറപ്രവർത്തകർ പുറത്തുവിടുന്നത്. പുതിയ പോസ്റ്ററും ചിത്രത്തിന്റെ ദുരൂഹമായ പ്രമേയത്തിലേക്കുള്ള സൂചന നൽകുന്നു.

സത്യവും മിഥ്യയും കൈകോർക്കുന്ന പശ്ചാത്തലത്തിലാണ് ചിത്രം ഒരുക്കുന്നത്. വിപരീത ആരാധനാക്രമങ്ങളെ പിന്തുടരുന്ന ഒരു സമൂഹത്തിന്റെ കഥ ഫാന്റസി ത്രില്ലർ സ്വഭാവത്തിലാണ് ജിതിൻ കെ.ജോസ് അവതരിപ്പിക്കുന്നത്.

ജയസൂര്യയ്ക്കൊപ്പം നൈല ഉഷ, വിജയ് ബാബു, അർഷാ ബൈജു, നിരഞ്ജന അതുൽ, ജിബിൻ ഗോപിനാഥ്, മുബിൻ എം. റാഫി, വൈഷ്ണവി എന്നിവരും പ്രധാന വേഷങ്ങളിലെത്തുന്നു.

പ്രമുഖ തിരക്കഥാകൃത്തും സംവിധായകനുമായ റാഫിയും സംവിധായകൻ ജിതിൻ കെ. ജോസും ചേർന്നാണ് തിരക്കഥ. മുജീബ് മജീദ് സംഗീതവും ഫൈസൽ അലി ഛായാഗ്രഹണവും നിർവഹിക്കുന്നു. പ്രവീൺ കുമാറാണ് എഡിറ്റർ.

രോഹിത് ആർ. നായർ എക്സിക്യൂട്ടീവ് പ്രൊഡ്യൂസറാണ്. സുനിൽ ദാസ് കലാസംവിധാനവും അമൽ ചന്ദൻ മേക്കപ്പും സമീറ സനീഷ് വസ്ത്രാലങ്കാരവും നിർവഹിക്കുന്നു. സിനറ്റ് സേവ്യറാണ് സ്റ്റിൽ ഫോട്ടോഗ്രഫി.

വി.ബോസ് ചീഫ് അസോസിയേറ്റ് ഡയറക്ടറും പീറ്റർ അർത്തുങ്കൽ പ്രൊഡക്ഷൻ മാനേജരുമാണ്. എബി ബെന്നി പ്രൊഡക്ഷൻ എക്സിക്യൂട്ടീവും കിരൺ കാന്ത് പ്രൊഡക്ഷൻ വിഭാഗത്തിലും പ്രവർത്തിക്കുന്നു. ദീപക് പരമേശ്വരനാണ് പ്രൊഡക്ഷൻ കൺട്രോളർ. പി.ആർ.ഒ. വാഴൂർ ജോസ്.