Follow the FOURTH PILLAR LIVE channel on WhatsApp
തിരുവനന്തപുരം: ഭാരതക്കുന്ന് എന്ന സാങ്കല്പിക ഗ്രാമം. വർഷങ്ങളായി ഈ ഗ്രാമത്തിൽ നിലനിന്നു പോരുന്ന ഒരു കാര്യമാണ് വിവാഹം മുടക്കൽ. അവർക്ക് ഇത് മത്സരവും ആഘോഷവും പോലെയാണ്. ആൺ പെൺ വ്യത്യാസമില്ലാതെ തലമുറതലമുറ കൈമാറി ഈ കാര്യം നിലനിന്നു പോരുന്നു. സ്വന്തം മക്കളുടെ വിവാഹം പോലും മുടക്കുന്നതിൽ ഇവർക്ക് തെല്ലും ദുഃഖമില്ല. ഏറ്റവും കൂടുതൽ കല്യാണം മുടക്കുന്നവർക്ക് മുടക്കുദണ്ഡ് എന്ന പാരിതോഷികവും നൽകുന്നു.
ഇവിടെ വത്സല ക്ലബ്ബ് എന്നൊരു ക്ലബ്ബ് പ്രവർത്തിക്കുന്നുണ്ട്. നാട്ടിൽ നടക്കുന്ന ഈ കല്യാണം മുടക്കലിനെ ശക്തമായി എതിർക്കുന്ന ഏതാനും ചെറുപ്പക്കാർ ഈ ക്ലബ്ബിൻ്റെ സജീവ പ്രവർത്തകരാണ്. ഈ പ്രശ്നത്തിൻ്റെ പേരിൽ ക്ലബ്ബ് പ്രവർത്തകരും നാട്ടുകാരും രണ്ടു ചേരികളിലായി. ഇവർക്കിടയിലേക്ക് ഒരു പെൺകുട്ടി കടന്നു വരുന്നതോടെ കഥാഗതിയിൽ വലിയൊരു വഴിത്തിരിവിനു വഴിയൊരുക്കുന്നു. നവാഗതനായ അനുഷ് മോഹൻ സംവിധാനം ചെയ്യുന്ന വത്സല ക്ലബ്ബ് എന്ന ചിത്രത്തിൻ്റെ പശ്ചാത്തലമാണിത്. തികച്ചും കൗതുകകരമായ ഒരു പ്രമേയം ഹ്യൂമർ, ഫാൻ്റസി ജോണറിൽ അവതരിപ്പിക്കുയാണ്.
ഫാൽക്കൺ സിനിമാസിൻ്റെ ബാനറിൽ എസ്.ജിനിയാണ് വത്സല ക്ലബ്ബ് നിർമ്മിക്കുന്നത്. ചിത്രത്തിൻ്റെ ഫസ്റ്റ് ലുക്ക് പോസ്റ്റർ പുറത്തുവിട്ടു. സാധാരണക്കാർ താമസിക്കുന്ന ഒരു ഗ്രാമത്തിൻ്റെ പശ്ചാത്തലത്തിലാണ് ഈ ചിത്രത്തിൻ്റെ അവതരണം. അതിനാൽത്തന്നെ താരപ്പൊലിമയേക്കാളുപരി കഥക്കനുയോജ്യമായവരും സമീപകാല മലയാള സിനിമകളിലൂടെ ശ്രദ്ധേയരായവരുമാണ് ഈ ചിത്രത്തിലെ അഭിനേതാക്കൾ.
വിനീത് തട്ടിൽ, അഖിൽ കവലയൂർ, കാർത്തിക്ക് ശങ്കർ, രൂപേഷ് പീതാംബരൻ, അരിസ്റ്റോ സുരേഷ്, അംബി, വിശാഖ്, ഗൗരി, മല്ലികാ സുകുമാരൻ, ജിബിൻ ഗോപിനാഥ്, അനിൽ രാജ്, അരുൺമ്പോൾ, ദീപു കരുണാകരൻ, പ്രിയാ ശ്രീജിത്ത്, ബിനോജ് കുളത്തൂർ, രാഹുൽ നായർ, ദീപു നാവായിക്കുളം, അനീഷ്, ഗൗതം ജി.ശശി, അസീന റീന, അരുൺ ഭാസ്ക്കർ, ആമി തിലക് എന്നിവരാണ് ഈ ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. ധ്യാൻ ശ്രീനിവാസൻ ഈ ചിത്രത്തിലെ ഒരു മുഖ്യ കഥാപാത്രത്തെ അവതരിപ്പിക്കുന്നു.
രചന -ഫൈസ് ജമാൽ, സംഗീതം – എസ്.ജിനി, ഛായാഗ്രഹണം – ശൗരിനാഥ്, എഡിറ്റിങ് – രാകേഷ് അശോക, കലാസംവിധാനം – അജയ് ജി.അമ്പലത്തറ, മേക്കപ്പ് – സന്തോഷ് വെൺപകൽ, കോസ്റ്റ്യും ഡിസൈൻ – ബ്യൂസി ബേബി ജോൺ, ഡിസൈൻ – ആനന്ദ് രാജേന്ദ്രൻ, ചീഫ് അസോസിയേറ്റ് ഡയറക്ടർ – ഡി.സി.അനുരാജ്, പ്രൊഡക്ഷൻ മാനേജർ – കുര്യൻ ജോസഫ്, പ്രൊഡക്ഷൻ എക്സിക്യൂട്ടീവ് – ഹരി കാട്ടാക്കട, പ്രൊഡക്ഷൻ കൺട്രോളർ – എസ്.മുരുകൻ, പി.ആർ.ഒ. -വാഴൂർ ജോസ്.
തിരുവനന്തപുരത്തും പരിസരങ്ങളിലുമായി വത്സല ക്ലബ്ബിൻ്റെ ചിത്രീകരണം പുരോഗമിക്കുന്നു.
