തിരുവനന്തപുരം: വാട്ട്സാപ്പ് ഗ്രൂപ്പ് വിവാദത്തില്‍ വ്യവസായ വകുപ്പ് ഡയറക്ടര്‍ കെ.ഗോപാലകൃഷ്ണനെതിരെയും മേലുദ്യോഗസ്ഥനെ പരസ്യമായ അധിക്ഷേപിച്ച വിഷയത്തില്‍ കൃഷി വകുപ്പ് സ്പെഷല്‍ സെക്രട്ടറി എന്‍.പ്രശാന്തിനെതിരെയും അച്ചടക്ക നടപടിയെടുത്ത് സര്‍ക്കാര്‍. രണ്ടു പേരെയും സര്‍വ്വീസില്‍ നിന്ന് സസ്‌പെന്‍ഡ് ചെയ്തു.
Follow the FOURTH PILLAR LIVE channel on WhatsApp
രണ്ടുദ്യോഗസ്ഥരും ഉള്‍പ്പെട്ട വിഷയങ്ങളെ സംബന്ധിച്ച് ചീഫ് സെക്രട്ടറി ശാരദാ മുരളീധരന്റെ റിപ്പോര്‍ട്ട് മുഖ്യമന്ത്രി പിണറായി വിജയനു കൈമാറിയിരുന്നു. അതു പ്രകാരമാണ് നടപടി.
വാട്ട്സാപ്പ് ഗ്രൂപ്പ് വിവാദത്തില്‍ മൊബൈല്‍ ഹാക്ക് ചെയ്തതാണെന്ന ഗോപാലകൃഷ്ണന്റെ വിശദീകരണം ശരിയല്ലെന്ന് പൊലീസ് റിപ്പോര്‍ട്ട് നല്കിയിരുന്നു. അഡീഷണല്‍ ചീഫ് സെക്രട്ടറി ഡോ.എ.ജയതിലകിനെതിരെ സമൂഹമാധ്യമത്തിലൂടെ പ്രശാന്ത് നടത്തിയത് പരസ്യമായ വിമര്‍ശനമായതിനാല്‍ അദ്ദേഹത്തോട് പ്രത്യേകിച്ച് വിശദീകരണം തേടാതെ തന്നെ ചീഫ് സെക്രട്ടറി നേരിട്ട് റിപ്പോര്‍ട്ട് നല്കുകയായിരുന്നു.
വാട്ട്സാപ്പ് ഗ്രൂപ്പ് വിവാദത്തില്‍ ഗോപാലകൃഷ്ണന്‍ തന്നെയാണ് പൊലീസിന് പരാതി നല്കിയത്. തന്റെ മൊബൈല്‍ ഹാക്ക് ചെയ്തു എന്ന അദ്ദേഹത്തിന്റെ വാദത്തിനുള്ള തെളിവുകളൊന്നും പൊലീസിന് കണ്ടെത്താനായില്ല. അഡീഷണല്‍ ചീഫ് സെക്രട്ടറി ജയതിലകിനെ മനോരോഗി എന്ന് വരെ വിളിച്ചുള്ള പരസ്യ അധിക്ഷേപത്തിലാണ് പ്രശാന്തിനെതിരായ നടപടി.
