മടക്കാവുന്ന ഐഫോൺ, പുതിയ നായകൻ, പുതിയ കാലം

Follow the FOURTH PILLAR LIVE channel on WhatsApp 

ആപ്പിളിന്റെ സെപ്റ്റംബർ ചടങ്ങുകൾ ഓരോ വർഷവും സാങ്കേതികലോകം കാത്തിരിക്കുന്ന വലിയ നിമിഷങ്ങളിലൊന്നാണ്. പുതിയ ഐഫോൺ എന്ത് കൊണ്ടുവരും, ക്യാമറയിൽ എന്ത് മാറ്റമുണ്ടാകും, വില എത്ര ഉയരും തുടങ്ങിയ പതിവുചോദ്യങ്ങളാണ് സാധാരണയായി ചർച്ചയാകാറുള്ളത്. എന്നാൽ ഇത്തവണ കഥ അതിലേറെ വലുതാണ്.

സെപ്റ്റംബർ 9ന് നടക്കുന്ന ‘സർപ്രൈസ് ആൻഡ് ഷൈൻ’ ചടങ്ങ് ആപ്പിളിന് ഒരു പുതിയ ഐഫോൺ അവതരിപ്പിക്കുന്ന വേദി മാത്രമാകില്ല. പുതിയ മേധാവിയുടെ കീഴിലെ ആദ്യ വലിയ ഉത്പന്നാവതരണവും, കമ്പനിയുടെ ചരിത്രത്തിലെ ആദ്യ മടക്കാവുന്ന ഐഫോൺ പ്രതീക്ഷിക്കപ്പെടുന്ന വേദിയും കൂടിയാകും അത്.

സെപ്റ്റംബർ 1ന് ടിം കുക്കിൽനിന്ന് ആപ്പിളിന്റെ ചീഫ് എക്സിക്യൂട്ടീവ് ഓഫീസർ സ്ഥാനം ഏറ്റെടുക്കുന്ന ജോൺ ടെർനസാണ് ഇത്തവണ വേദിയുടെ രാഷ്ട്രീയവും സാങ്കേതികവുമായ കേന്ദ്രം. ടിം കുക്ക് എക്സിക്യൂട്ടീവ് ചെയർമാനായി മാറുമ്പോൾ, ആപ്പിളിന്റെ അടുത്ത അധ്യായം എങ്ങനെയായിരിക്കുമെന്ന് ആദ്യമായി സൂചന നൽകേണ്ടത് ടെർനസിനാണ്.

കാത്തിരിപ്പിന് വിരാമമാകുമോ മടക്കാവുന്ന ഐഫോൺ?

വർഷങ്ങളായി ആപ്പിളിനെ പിന്തുടരുന്ന ഒരു ചോദ്യം ഉണ്ട്: മടക്കാവുന്ന ഫോൺ എപ്പോൾ? സാംസങ് ഉൾപ്പെടെയുള്ള എതിരാളികൾ ഏറെക്കാലമായി ഈ വിഭാഗത്തിൽ മുന്നേറിക്കഴിഞ്ഞു. മടക്കാവുന്ന ഫോണുകൾ ഇപ്പോഴും സാധാരണ സ്മാർട്ട്ഫോണുകളെപ്പോലെ വൻവിപണി നേടിയിട്ടില്ലെങ്കിലും ഉയർന്ന വിലയും പുതുമ തേടുന്ന ഉപഭോക്താക്കളും ഈ വിഭാഗത്തെ കമ്പനികൾക്ക് ആകർഷകമാക്കുന്നു. ഇത്തവണ അതിന് ആപ്പിൾ മറുപടി നൽകുമെന്നാണ് പ്രതീക്ഷ.

ഐപാഡ് മിനിയോട് സാമ്യമുള്ള വലുപ്പത്തിലേക്ക് തുറക്കാവുന്ന സ്ക്രീനോടെയുള്ള മടക്കാവുന്ന ഐഫോൺ അവതരിപ്പിക്കുമെന്നാണ് വിപണിവൃത്തങ്ങളിലെ സൂചന. സാധാരണ ഐഫോണിനേക്കാൾ ഉയർന്ന വിലയുള്ള അത്യുന്നത ശ്രേണിയിലായിരിക്കും ഇത് എത്തുക. മടക്കാവുന്ന ഐഫോൺ വന്നാൽ ഈ വിപണി തന്നെ മറ്റൊരു ഘട്ടത്തിലേക്ക് കടക്കുമെന്നാണ് വിലയിരുത്തൽ.

ഒരു വിഭാഗത്തിലേക്ക് ആപ്പിൾ പ്രവേശിക്കുമ്പോൾ അതിന്റെ രൂപകല്പനയും ഉപയോഗാനുഭവവും പിന്നീട് വിപണിയുടെ പൊതുമാനദണ്ഡമായി മാറിയ ചരിത്രമുണ്ട്. സാംസങ്ങും ആപ്പിളിന്റെ പ്രവേശനത്തെ ഭീഷണിയായുമാത്രമല്ല കാണുന്നത്. മടക്കാവുന്ന ഫോണുകളെക്കുറിച്ചുള്ള പൊതുശ്രദ്ധ വർധിക്കുന്നത് മുഴുവൻ വിഭാഗത്തിനും ഗുണകരമാകുമെന്നാണ് കമ്പനി നേതൃത്വത്തിന്റെ നിലപാട്.

ഐഫോൺ 18 പ്രോയ്ക്കും വേദിയൊരുങ്ങുന്നു

മടക്കാവുന്ന ഐഫോൺ തന്നെയാകും ഏറ്റവും വലിയ കൗതുകമെങ്കിലും പതിവ് ഐഫോൺ ശ്രേണിയും ചടങ്ങിന്റെ പ്രധാന ഭാഗമായിരിക്കും. ഐഫോൺ 18 പ്രോ, ഐഫോൺ 18 പ്രോ മാക്സ് എന്നിവയാണ് പ്രതീക്ഷിക്കപ്പെടുന്ന പ്രധാന മോഡലുകൾ. കഴിഞ്ഞ വർഷം ആപ്പിൾ അവതരിപ്പിച്ച മെലിഞ്ഞ ഐഫോൺ എയറിനും ഐഫോൺ 17 ശ്രേണിക്കും ലഭിച്ച സ്വീകരണത്തിന് പിന്നാലെയാണ് പുതിയ തലമുറ എത്തുന്നത്.

ആപ്പിൾ വാച്ചിന്റെ പുതിയ പതിപ്പുകളും മറ്റ് അനുബന്ധ ഉപകരണങ്ങളും വേദിയിലെത്താൻ സാധ്യതയുണ്ട്. എന്നാൽ ഇത്തവണ ഏതു പുതിയ ക്യാമറയോ ചിപ്പോ അവതരിപ്പിക്കുന്നു എന്നതിനേക്കാൾ വലിയ ചോദ്യം, ആപ്പിൾ ഇനി എങ്ങോട്ടാണ് പോകുന്നത്? എന്നതാണ്.

ജോൺ ടെർനസിന്റെ ആദ്യ വേദി

ഹാർഡ്‌വെയർ എൻജിനീയറിങ്ങിലാണ് ജോൺ ടെർനസിന്റെ ശക്തി. വർഷങ്ങളായി ആപ്പിളിന്റെ ഉപകരണ രൂപകല്പനയുടെയും സാങ്കേതിക വികസനത്തിന്റെയും കേന്ദ്രത്തിൽ പ്രവർത്തിച്ചയാളാണ് അദ്ദേഹം. അതുകൊണ്ടുതന്നെ ടെർനസിന്റെ നിയമനം ഒരു സന്ദേശമായാണ് സാങ്കേതികലോകം കാണുന്നത്. സോഫ്റ്റ്‌വെയറിലും സേവനങ്ങളിലും മാത്രം അല്ല, വീണ്ടും ഉപകരണങ്ങളിൽ വലിയ പുതുമ കൊണ്ടുവരാനുള്ള ശ്രമത്തിലേക്കാണ് ആപ്പിൾ തിരിയുന്നതെന്ന സൂചന.

ടിം കുക്കിന്റെ കാലത്ത് ആപ്പിൾ സാമ്പത്തികമായി വലിയ വളർച്ചയാണ് നേടിയത്. ഐഫോൺ വില്പനയ്ക്കപ്പുറം സേവനങ്ങളും ധരിക്കാവുന്ന ഉപകരണങ്ങൾ -വെയറബ്ൾസും കമ്പനിയുടെ വരുമാനത്തിൽ വലിയ പങ്കുവഹിച്ചു. എന്നാൽ സമീപകാലത്ത് നിർമിതബുദ്ധി രംഗത്ത് ഗൂഗിളിനും മൈക്രോസോഫ്റ്റിനും ഓപ്പൺ എ.ഐക്കും മറ്റും പിന്നിലാണ് ആപ്പിൾ എന്ന വിമർശനം ശക്തമാണ്. ആ വിടവ് നികത്തേണ്ട ഉത്തരവാദിത്വവും ടെർനസിന്റെ മേൽ വരുന്നു.

നിർമിതബുദ്ധിയിൽ പുതിയ തുടക്കം?

പുതിയ മേധാവിയിൽനിന്ന് വിപണി പ്രതീക്ഷിക്കുന്ന ഏറ്റവും പ്രധാന സന്ദേശം നിർമിതബുദ്ധിയെക്കുറിച്ചായിരിക്കും. ഐഫോണും മാക്കും ഐപാഡും വാച്ചും ഉൾപ്പെടെയുള്ള ഉപകരണങ്ങളെ നിർമിതബുദ്ധിയുമായി കൂടുതൽ ആഴത്തിൽ ബന്ധിപ്പിക്കുന്നൊരു പുതിയ കാലഘട്ടം ടെർനസ് പ്രഖ്യാപിക്കുമോ എന്നാണ് എല്ലാവരും നോക്കുന്നത്. ബാങ്ക് ഓഫ് അമേരിക്കയിലെ വിശകലനവിദഗ്ധരുടെ വിലയിരുത്തലിൽ, നിർമിതബുദ്ധി കേന്ദ്രീകൃത കാലത്ത് ഉപകരണവിപണിയിലെ ആപ്പിളിന്റെ മേൽക്കൈ കൂടുതൽ ശക്തമാക്കാനുള്ള അവസരമാണ് ടെർനസിന് മുന്നിലുള്ളത്.

അത് നിർണായകമാണ്. കാരണം നിർമിതബുദ്ധിയുടെ മത്സരത്തിൽ പിന്നിലാണെന്ന വിമർശനം ആപ്പിളിനെ ഏറെക്കാലമായി പിന്തുടരുന്നു. ഒരു മടക്കാവുന്ന ഐഫോൺ മാത്രമല്ല, നിർമിതബുദ്ധിയെ അടിസ്ഥാനമാക്കി പുതിയൊരു ഉപകരണലോകം നിർമ്മിക്കുക എന്നതായിരിക്കും പുതിയ നേതൃത്വത്തിന്റെ വലിയ വെല്ലുവിളി.

വില മുടക്കാവുമോ?

പുതിയ ഐഫോണിനെ ചുറ്റിപ്പറ്റിയുള്ള ആവേശത്തിനൊപ്പം ഉപഭോക്താക്കളെ ആശങ്കപ്പെടുത്തുന്ന കാര്യം വിലയാണ്. ലോകവ്യാപകമായി മെമ്മറി, സംഭരണ ചിപ്പുകളുടെ ക്ഷാമം എന്നിവ ഇലക്ട്രോണിക് ഉല്പന്നങ്ങളുടെ വില ഉയർത്തിയിട്ടുണ്ട്. ആപ്പിൾ ജൂലൈയിൽ മാക്‌ബുക്കുകളുടെയും ഐപാഡുകളുടെയും ചില മോഡലുകളുടെ വില കൂട്ടിയിരുന്നു. വിതരണശൃംഖലയിലെ കുറവ് വില്പനയെ ബാധിക്കാമെന്നും കമ്പനി തന്നെ മുന്നറിയിപ്പ് നൽകിയിട്ടുണ്ട്. അതുകൊണ്ട് സെപ്റ്റംബറിൽ പുറത്തിറങ്ങുന്ന ഐഫോണുകൾക്കും വില കൂടുമെന്നാണ് വിപണിവിലയിരുത്തൽ.

ഇന്നത്തെ 1,000 ഡോളർ (95,500 രൂപ) മുതൽ 1,200 ഡോളർ (1,14,500 രൂപ) വരെയുള്ള ഉയർന്ന ഐഫോൺ വിലയുടെ മാനദണ്ഡം ഇനി 1,500 ഡോളറിലേക്ക് (1,43,200 രൂപ) നീങ്ങേണ്ടിവരുമെന്നാണ് ചില വിദഗ്ധരുടെ വിലയിരുത്തൽ. മടക്കാവുന്ന ഐഫോൺ അതിലും വിലയേറിയതാകാനാണ് സാധ്യത. സാംസങ്ങിന്റെ ഉയർന്ന ശ്രേണിയിലെ ഗാലക്സി ഇസഡ് ഫോൾഡ് മോഡലുകൾക്ക് ഏകദേശം 2,000 ഡോളർ (1,91,000 രൂപ) വില വരുന്നതിനാൽ ആപ്പിളും അത്യുന്നത വിലവിഭാഗത്തിലേക്കാകും കടക്കുകയെന്നാണ് പ്രതീക്ഷ.

ആപ്പിളിന് എന്തുകൊണ്ട് മടക്കാവുന്ന ഫോൺ പ്രധാനമാണ്?

ആപ്പിളിന്റെ വരുമാനത്തിന്റെ ഏകദേശം പകുതിയും ഇപ്പോഴും ഐഫോണിൽ നിന്നാണ്. അതിനാൽ ഐഫോണിൽ വലിയൊരു പുതിയ വിഭാഗം തുറക്കുന്നത് കമ്പനിക്ക് വെറും രൂപകല്പനാ പരീക്ഷണമല്ല; സാമ്പത്തികമായും നിർണായകമാണ്. സാധാരണ ഐഫോൺ ഉപയോഗിക്കുന്നവരിൽ ചിലരെ കൂടുതൽ വിലയുള്ള മടക്കാവുന്ന മോഡലിലേക്ക് മാറ്റാൻ കഴിഞ്ഞാൽ ഓരോ ഉപകരണത്തിൽനിന്നുമുള്ള ശരാശരി വരുമാനം ഉയരും. സാംസങ്ങിലേക്കോ മറ്റ് എതിരാളികളിലേക്കോ പോകുന്ന ഉയർന്ന വില നൽകാൻ തയ്യാറുള്ള ഉപഭോക്താക്കളെയും ആപ്പിളിലേക്ക് ആകർഷിക്കാം.

വിപണിഗവേഷണ സ്ഥാപനമായ ഐ.ഡി.സിയുടെ കണക്കുകൾ പ്രകാരം 2027ഓടെ ആപ്പിൾ 1.7 കോടിയിലധികം മടക്കാവുന്ന ഐഫോണുകൾ കയറ്റുമതി ചെയ്യാൻ സാധ്യതയുണ്ട്. അതേസമയം സാധാരണ സ്മാർട്ട്ഫോൺ വിപണി സമ്മർദം നേരിടുമ്പോഴും മടക്കാവുന്ന ഫോണുകളുടെ വില്പന വളരുമെന്നാണ് പ്രതീക്ഷ. അതുകൊണ്ടുതന്നെ ആപ്പിളിന്റെ പ്രവേശനം ഈ ചെറിയ വിപണിയെ മുഖ്യധാരയിലേക്ക് കൊണ്ടുവരുമോ എന്ന ചോദ്യത്തിന് വലിയ പ്രാധാന്യമുണ്ട്.

പഴയ ആപ്പിൾ വേദികളുടെ ആവേശം മടങ്ങിവരുമോ?

ഇത്തവണത്തെ ചടങ്ങിന് മറ്റൊരു പ്രത്യേകതയും പ്രതീക്ഷിക്കപ്പെടുന്നു. വർഷങ്ങളായി മുൻകൂട്ടി ചിത്രീകരിച്ച അവതരണങ്ങൾക്കാണ് ആപ്പിൾ കൂടുതൽ ആശ്രയിച്ചിരുന്നത്. എന്നാൽ സെപ്റ്റംബർ 9ന് സ്റ്റീവ് ജോബ്സ് തിയേറ്ററിലേക്ക് കൂടുതൽ പൂർണമായ നേരിട്ടുള്ള അവതരണരീതി തിരിച്ചെത്തുമെന്ന സൂചനകളുണ്ട്. അങ്ങനെ സംഭവിച്ചാൽ പഴയ ആപ്പിൾ അവതരണങ്ങളുടെ നാടകീയതയും ‘ഇനിയും ഒരു കാര്യമുണ്ട്’ എന്ന പ്രതീക്ഷയും വീണ്ടും വേദിയിലേക്ക് മടങ്ങിവന്നേക്കാം.

‘സർപ്രൈസ് ആൻഡ് ഷൈൻ’ എന്ന ക്ഷണക്കുറിപ്പിലെ വാചകം എന്താണ് സൂചിപ്പിക്കുന്നത് എന്നത് കമ്പനി വ്യക്തമാക്കിയിട്ടില്ല. അതുകൊണ്ടുതന്നെ ഓരോ വാക്കിനും രൂപത്തിനും ആരാധകർ സ്വന്തം വ്യാഖ്യാനങ്ങൾ കണ്ടെത്തുകയാണ്.

ടിം കുക്കിനുശേഷമുള്ള ആപ്പിൾ

സെപ്റ്റംബർ 9ലെ ചടങ്ങിന്റെ ചരിത്രപ്രാധാന്യം ഒടുവിൽ ഇവിടെ തന്നെയാണ്. പുതിയ ഐഫോൺ എല്ലാ വർഷവും വരും. പുതിയ ആപ്പിൾ വാച്ചും വരും. ഒരിക്കൽ മടക്കാവുന്ന ഐഫോണും വരേണ്ടതായിരുന്നു. എന്നാൽ ഒരേ വേദിയിൽ പുതിയൊരു ഉത്പന്നവിഭാഗവും പുതിയൊരു നേതൃത്വകാലവും ഒരുമിച്ച് തുടങ്ങുന്നത് അപൂർവമാണ്.

ടിം കുക്കിന്റെ കാലം ആപ്പിളിനെ ലോകത്തിലെ ഏറ്റവും മൂല്യമേറിയ കമ്പനികളിലൊന്നാക്കി. ജോൺ ടെർനസിന്റെ കാലത്ത് ചോദ്യം മറ്റൊന്നായിരിക്കും: ആപ്പിളിന് വീണ്ടും ലോകത്തെ അത്ഭുതപ്പെടുത്താനാകുമോ? മടക്കാവുന്ന ഐഫോൺ അതിന്റെ ആദ്യ ഉത്തരമാകാം. നിർമിതബുദ്ധിയുമായി ചേർന്ന പുതിയ ഉപകരണങ്ങൾ അടുത്തതാകാം.

സെപ്റ്റംബർ 9ന് വേദിയിലെത്തുന്നത് ഐഫോൺ 18 മാത്രമല്ല. ടിം കുക്കിനുശേഷമുള്ള ആപ്പിളിന്റെ ആദ്യ രൂപരേഖയാണ്. അതിനാലാണ് ഇത്തവണത്തെ ‘സർപ്രൈസ് ആൻഡ് ഷൈൻ’ ഒരു സാധാരണ ഐഫോൺ അവതരണത്തേക്കാൾ ഏറെ വലുതാകുന്നത്.