മറുപടിക്കു പകരം മറുചോദ്യങ്ങൾ!!

Follow the FOURTH PILLAR LIVE channel on WhatsApp 

മുഖ്യമന്ത്രി വി ഡി സതീശന്റെ വാർത്താസമ്മേളനം അവസാനിച്ചതേയുള്ളൂ. ഇനി സമൂഹമാധ്യമങ്ങളിൽ ഒരു വാചകം നിറയും: “വിമർശകരെ മുഖ്യമന്ത്രി മലർത്തിയടിച്ചു.” എന്നാൽ ആരെയാണ് മലർത്തിയടിച്ചത്? എന്ത് ചോദ്യത്തിനാണ് വ്യക്തമായ മറുപടി ലഭിച്ചത്? വാർത്താസമ്മേളനത്തിൽ കേട്ടത് വിശദീകരണങ്ങളായിരുന്നോ, അതോ ചോദ്യങ്ങളിൽനിന്ന് രക്ഷപ്പെടാനുള്ള മറുചോദ്യങ്ങളും പരിഹാസങ്ങളുമായിരുന്നോ?

ഹെലികോപ്ടർ യാത്രയെക്കുറിച്ച് ചോദിച്ചപ്പോൾ നിക്ഷേപം പറഞ്ഞു. നിക്ഷേപകന്റെ പേര് ചോദിച്ചപ്പോൾ കേരളത്തിലേക്ക് നിക്ഷേപം വരുന്നത് തടയാനാണോ എന്ന മറുചോദ്യം. ദുരന്തകാലത്തെ വിരുന്നിനെക്കുറിച്ച് ചോദിച്ചപ്പോൾ “മുഖ്യമന്ത്രി ഭക്ഷണം കഴിക്കരുതോ” എന്ന പരിഹാസം. രക്ഷാപ്രവർത്തനം വൈകിയെന്ന വിമർശനത്തിന് എല്ലാം ഭംഗിയായി നടന്നുവെന്ന പ്രഖ്യാപനം.

ഇതാണ് പുതിയ ഭരണത്തിന്റെ മറുപടി രീതി. ചോദ്യം ചോദിക്കുന്നവനെ കുറ്റക്കാരനാക്കുക. സ്വന്തം ഉത്തരവാദിത്വത്തെക്കുറിച്ച് പറയാതെ പഴയ സർക്കാരിനെ കുറ്റപ്പെടുത്തുക. അവസാനം സൈബർ സംഘങ്ങളെക്കൊണ്ട് “മലർത്തിയടിച്ചു” എന്ന് പ്രചരിപ്പിക്കുക.

രഹസ്യ നിക്ഷേപകനുവേണ്ടിയുള്ള പറക്കൽ

സർക്കാർ വാടകയ്ക്കെടുത്ത ഹെലികോപ്ടറിൽ കൊച്ചിയിലേക്കു പോയത് ചികിത്സയിലുള്ള ഭാര്യാപിതാവിനെ കാണാനല്ലെന്നും ഒരു സ്വകാര്യ നിക്ഷേപക സംഘത്തെ കാണാനാണെന്നുമാണ് മുഖ്യമന്ത്രിയുടെ വിശദീകരണം. തമിഴ്നാട് മുഖ്യമന്ത്രിയെ കണ്ട സംഘം ഡൽഹിയിലേക്ക് മടങ്ങുന്നതിനു മുമ്പ് അവരെ കാണേണ്ടിവന്നതിനാലാണ് അടിയന്തരമായി ഹെലികോപ്ടറിൽ പോയതെന്നും അദ്ദേഹം പറഞ്ഞു. എന്നാൽ ആ നിക്ഷേപക സംഘം ഏതാണെന്ന് വെളിപ്പെടുത്തിയില്ല.

ഔദ്യോഗിക യാത്രയാണെന്ന് പറയുന്ന മുഖ്യമന്ത്രി, അതിന്റെ ഔദ്യോഗിക ഉദ്ദേശ്യം ജനങ്ങളോട് വ്യക്തമാക്കേണ്ടതുണ്ട്. ആരെയാണ് കണ്ടത്? ഏതു മേഖലയിലാണ് നിക്ഷേപം? സർക്കാർ ഉദ്യോഗസ്ഥർ കൂടെയുണ്ടായിരുന്നോ? കൂടിക്കാഴ്ചയുടെ രേഖകളുണ്ടോ? കേരളത്തിന് എന്തു നേട്ടമാണ് ലഭിച്ചത്? ഈ ചോദ്യങ്ങൾക്ക് ഉത്തരം നൽകുന്നതിനു പകരം “നിക്ഷേപം വരാതിരിക്കാനാണോ പേര് ചോദിക്കുന്നത്” എന്നു ചോദിക്കുന്നത് ജനാധിപത്യപരമായ മറുപടിയല്ല.

പൊതുപണംകൊണ്ട് വാടകയ്ക്കെടുത്ത ഹെലികോപ്ടറിലാണ് യാത്ര. അതുകൊണ്ട് പൊതുജനത്തിന് യാത്രയുടെ ലക്ഷ്യം അറിയാൻ അവകാശമുണ്ട്. നിക്ഷേപകന്റെ പേര് പോലും പറയാൻ കഴിയാത്ത ഒരു യാത്രയെ ഔദ്യോഗികമെന്ന് ജനങ്ങൾ കണ്ണടച്ച് അംഗീകരിക്കണമെന്നാണോ മുഖ്യമന്ത്രി കരുതുന്നത്?

25 മണിക്കൂർ ‘സൗജന്യം’ അല്ല

ഹെലികോപ്ടർ യാത്രയ്ക്ക് സർക്കാരിന് 5 പൈസപോലും അധികമായി ചെലവായിട്ടില്ലെന്നാണ് അടുത്ത വാദം. മാസം 80 ലക്ഷം രൂപ വാടക നൽകുന്ന കരാറിൽ 25 മണിക്കൂർ പറക്കൽ ഉൾപ്പെട്ടിട്ടുണ്ടെന്നും അത് ഉപയോഗിച്ചില്ലെങ്കിലും പണം നൽകണമെന്നുമാണ് മുഖ്യമന്ത്രി പറഞ്ഞത്. ഇതിനെ “സൗജന്യയാത്ര” എന്നു വിളിക്കുന്നത് വാക്കുകളുടെ കളിയാണ്.

മാസം 80 ലക്ഷം രൂപ ആരാണ് നൽകുന്നത്? മുഖ്യമന്ത്രി സ്വന്തം പോക്കറ്റിൽനിന്നാണോ? സംസ്ഥാനത്തെ ജനങ്ങളുടെ നികുതിപ്പണത്തിൽനിന്നാണ്. കരാറിൽ 25 മണിക്കൂർ ഉൾപ്പെടുത്തിയിട്ടുണ്ടെന്നതിന്റെ അർത്ഥം ആ പറക്കലിന് പണമില്ല എന്നല്ല. അതിന്റെ പണം മുൻകൂട്ടി പൊതുഖജനാവിൽനിന്ന് നൽകുന്നു എന്നാണ്.

സർക്കാർ വാഹനം പെട്രോൾ ചെലവ് കൂടാതെ ലഭിക്കുന്നുവെന്ന കാരണത്താൽ ഒരു മന്ത്രി സ്വകാര്യയാത്ര നടത്തുന്നത് ശരിയാകുമോ? സെക്രട്ടേറിയറ്റിലെ മുറിക്ക് ദിവസവാടകയില്ലെന്ന കാരണത്താൽ അത് സ്വകാര്യ വ്യാപാരത്തിനായി ഉപയോഗിക്കാമോ? പൊതുസമ്പത്ത് ഉപയോഗിക്കുമ്പോൾ ചെലവ് മാത്രമല്ല വിഷയം. ആവശ്യം പൊതുവായിരുന്നോ എന്നതാണ് പ്രധാന ചോദ്യം.

ഹെലികോപ്ടറിന്റെ കരാർ സെപ്റ്റംബർവരെ ഉള്ളതുകൊണ്ട് സമയം തീർക്കാനായി പറക്കണമെന്ന വ്യവസ്ഥയില്ല. എയർ ആംബുലൻസ്, അവയവ കൈമാറ്റം, രക്ഷാപ്രവർത്തനം, സുരക്ഷാ നിരീക്ഷണം തുടങ്ങിയ ആവശ്യങ്ങൾക്ക് അത് സജ്ജമായി നിൽക്കേണ്ടതാണ്. പറക്കാത്ത ഓരോ മണിക്കൂറും മുഖ്യമന്ത്രിയുടെ വ്യക്തിഗത ഉപയോഗത്തിനുള്ള കൂപ്പണല്ല.

പിണറായി വിജയന്റെ യാത്രയെ വളച്ചൊടിക്കരുത്

സ്വന്തം യാത്രയെ ന്യായീകരിക്കാൻ മുഖ്യമന്ത്രി പിണറായി വിജയന്റെ 2017ലെ ഹെലികോപ്ടർ യാത്രയും എടുത്തുപറഞ്ഞു. പിണറായി വിജയൻ പാർട്ടി സമ്മേളനത്തിൽ പങ്കെടുക്കാൻ ദുരന്തനിവാരണ ഫണ്ടിൽനിന്ന് പണം ഉപയോഗിച്ചുവെന്ന പ്രതീതി സൃഷ്ടിക്കാനായിരുന്നു ശ്രമം. വസ്തുത മറ്റൊന്നാണ്.

2017 ഡിസംബർ 26ന് തൃശ്ശൂരിൽ സി.പി.എം. ജില്ലാ സമ്മേളനത്തിൽ പങ്കെടുത്തുകൊണ്ടിരിക്കെയാണ് ഓഖി ദുരന്തത്തിന്റെ ആഘാതം വിലയിരുത്താൻ എത്തിയ കേന്ദ്രസംഘവുമായി തിരുവനന്തപുരത്ത് അടിയന്തര കൂടിക്കാഴ്ച നിശ്ചയിച്ചത്. ആ ഔദ്യോഗിക ചുമതല നിർവഹിക്കാനാണ് പിണറായി വിജയൻ ഹെലികോപ്ടറിൽ തലസ്ഥാനത്തെത്തിയത്. കൂടിക്കാഴ്ചയ്ക്കുശേഷം തൃശ്ശൂരിലേക്കു മടങ്ങുകയും ചെയ്തു.

യാത്രാച്ചെലവായ 8 ലക്ഷം രൂപ സംസ്ഥാന ദുരന്തപ്രതികരണ ഫണ്ടിൽനിന്ന് അനുവദിച്ചുകൊണ്ട് ഉദ്യോഗസ്ഥതലത്തിൽ ഉത്തരവിറങ്ങിയിരുന്നു. വിവാദം ശ്രദ്ധയിൽപ്പെട്ടതോടെ ആ ഉത്തരവ് മുഖ്യമന്ത്രിയുടെ ഓഫീസ് റദ്ദാക്കി. പിന്നീട് പൊതുഭരണവകുപ്പാണ് ചെലവ് വഹിച്ചത്.

അതായത് പാർട്ടി സമ്മേളനത്തിൽ പോകാൻ ഹെലികോപ്ടർ ഉപയോഗിച്ചതല്ല. സമ്മേളനത്തിൽനിന്ന് ഔദ്യോഗിക ദുരന്ത അവലോകനത്തിനായി തലസ്ഥാനത്തേക്കു വന്നതാണ്. ഇത് രഹസ്യ നിക്ഷേപകന്റെ പേരിൽ കൊച്ചിയിലേക്ക് നടത്തിയ യാത്രയുമായി എങ്ങനെ തുല്യമാകും?

പിണറായി വിജയന്റെ യാത്രയുടെ ലക്ഷ്യം പരസ്യമായിരുന്നു. കേന്ദ്ര സംഘവുമായുള്ള കൂടിക്കാഴ്ച രേഖപ്പെടുത്തിയ ഔദ്യോഗിക പരിപാടിയായിരുന്നു. തെറ്റായ ഫണ്ടിൽനിന്ന് പണം അനുവദിച്ച ഉത്തരവ് റദ്ദാക്കുകയും ചെയ്തു. സതീശന്റെ യാത്രയുടെ ന്യായീകരണമാകട്ടെ ഇതുവരെ പേരില്ലാത്ത ഒരു നിക്ഷേപക സംഘമാണ്.

വിരുന്നല്ല ചോദ്യം; മുൻഗണനയാണ്

മഴയും ഉരുൾപൊട്ടലും വെള്ളപ്പൊക്കവും സംസ്ഥാനത്തെ വിറപ്പിച്ച ദിവസമാണ് മുഖ്യമന്ത്രി പൊന്നാനിയിലെ യൂത്ത് ലീഗ് നേതാവിന്റെ വീട്ടിൽ ഭക്ഷണം കഴിക്കുന്ന ദൃശ്യങ്ങൾ പുറത്തുവന്നത്. അതിനെക്കുറിച്ച് ചോദിച്ചപ്പോൾ “മുഖ്യമന്ത്രി ഭക്ഷണം കഴിക്കരുതോ” എന്ന പരിഹാസമായിരുന്നു മറുപടി.

മുഖ്യമന്ത്രി ഭക്ഷണം കഴിച്ചതല്ല വിമർശനം. നാട് ദുരന്തത്തെ നേരിടുമ്പോൾ മുഖ്യമന്ത്രിയുടെ മുൻഗണന എന്തായിരുന്നു എന്നതാണ് ചോദ്യം. ദുരന്തനിവാരണ അതോറിറ്റിയുടെ അധ്യക്ഷൻ എന്ന നിലയിൽ അദ്ദേഹം നിയന്ത്രണമുറിയിൽ ഉണ്ടായിരുന്നോ? മന്ത്രിമാരെയും കലക്ടർമാരെയും രക്ഷാസേനകളെയും കൃത്യസമയത്ത് ഏകോപിപ്പിച്ചോ? ദുരന്തം രൂക്ഷമാകുന്ന ഘട്ടത്തിൽ മുൻകൂട്ടിയുള്ള ഇടപെടൽ ഉണ്ടായോ?

മരണം, കാണാതാകൽ, വീടുകളുടെ തകർച്ച, ആയിരക്കണക്കിന് ആളുകളുടെ ക്യാമ്പുകളിലേക്കുള്ള മാറ്റം എന്നിവ റിപ്പോർട്ട് ചെയ്യപ്പെട്ട സാഹചര്യമായിരുന്നു അത്. ഓഗസ്റ്റ് 2ലെ ഔദ്യോഗിക കണക്കുകൾ പ്രകാരം 5,792 പേർ 209 ദുരിതാശ്വാസ ക്യാമ്പുകളിലുണ്ടായിരുന്നു.

മുഖ്യമന്ത്രി മുൻകരുതൽ യോഗങ്ങൾ നടത്തിയെന്നും കളക്ടർമാരെയും മന്ത്രിമാരെയും ബന്ധപ്പെട്ടെന്നും പറയുന്നു. ആ അവകാശവാദം പരിശോധിക്കപ്പെടട്ടെ. എന്നാൽ ജനങ്ങൾ ചോദിക്കുന്നത് മറ്റൊന്നാണ്: ദുരന്തത്തിന്റെ നിർണായക മണിക്കൂറുകളിൽ സംസ്ഥാനത്തിന്റെ ഭരണത്തലവന്റെ സാന്നിധ്യം എവിടെയായിരുന്നു? അതിന് “ഭക്ഷണം കഴിച്ചത് തെറ്റാണോ” എന്ന പരിഹാസം മറുപടിയല്ല.

ദുരന്തകാലത്ത് മുഖ്യമന്ത്രിയുടെ ഓരോ ദൃശ്യവും സന്ദേശമാണ്. ക്യാമ്പിൽ നിൽക്കുന്ന ചിത്രം പ്രതീക്ഷ നൽകും. നിയന്ത്രണമുറിയിലെ സാന്നിധ്യം ഭരണസംവിധാനത്തിന് കരുത്താകും. സ്വകാര്യ വിരുന്നിലെ ചിത്രം ഭരണത്തിന്റെ മുൻഗണനയെക്കുറിച്ച് സംശയം ഉയർത്തും. ഈ ലളിതമായ കാര്യം മനസ്സിലാക്കാൻ കഴിയാത്തതാണ് സതീശന്റെ യഥാർഥ പരാജയം.

എല്ലാം മുൻസർക്കാരിന്റെ തലയിൽ

നദികളിലും അണക്കെട്ടുകളിലും മണ്ണും മണലും അടിഞ്ഞതാണ് വെള്ളപ്പൊക്കത്തിന് കാരണമെന്നും മുൻസർക്കാർ അത് നീക്കിയില്ലെന്നുമാണ് മുഖ്യമന്ത്രിയുടെ മറ്റൊരു വാദം. ഇവിടെയും വസ്തുതകളെ മറയ്ക്കുകയാണ്.

2019ൽ മംഗലം, ചുള്ളിയാർ അണക്കെട്ടുകളിൽ പൈലറ്റ് അടിസ്ഥാനത്തിൽ മണ്ണുനീക്കുന്നതിനായി ആഗോള ടെൻഡർ നടപടികളിലേക്ക് എൽ.ഡി.എഫ്. സർക്കാർ നീങ്ങിയിരുന്നു. അരുവിക്കര ജലസംഭരണിയിലെ മണ്ണുനീക്കൽ പദ്ധതിയും എൽ.ഡി.എഫ്. ഭരണകാലത്ത് ആരംഭിച്ചു; സംഭരണശേഷി വർധിപ്പിക്കുകയായിരുന്നു ലക്ഷ്യം. തോട്ടപ്പള്ളി പൊഴിയിലെ മണൽ നീക്കലുമായി ബന്ധപ്പെട്ട് പിണറായി വിജയനും ഉദ്യോഗസ്ഥർക്കുമെതിരെ ഉയർത്തിയ അഴിമതി പരാതി കോടതി തള്ളിയതും മറക്കാനാകില്ല.

മണ്ണുനീക്കാൻ ശ്രമിച്ചാൽ അഴിമതിയെന്ന ആരോപണം. മഴക്കെടുതി വന്നാൽ മണ്ണുനീക്കാത്തത് മുൻസർക്കാരിന്റെ കുറ്റമെന്ന വാദം. രണ്ടും ഒരേസമയം ശരിയാകില്ല. പുതിയ സർക്കാർ അധികാരത്തിൽ വന്നശേഷം എന്തു ചെയ്തു എന്നാണ് സതീശൻ പറയേണ്ടത്. ഏതു നദിയിൽ മണ്ണുനീക്കി? ഏത് അണക്കെട്ടിൽ സംഭരണശേഷി പരിശോധിച്ചു? കാലവർഷത്തിനു മുമ്പ് എന്തു നടപടി സ്വീകരിച്ചു?

ഭരണം എന്നത് എല്ലാ പ്രശ്നത്തിനും മുൻസർക്കാരിന്റെ പേര് പറയുന്നതല്ല. അധികാരം ഏറ്റെടുത്ത ദിവസംമുതൽ ഉത്തരവാദിത്വവും ഏറ്റെടുക്കണം.

റാങ്ക് ഹോൾഡർമാരോട് പുതിയ ഭാഷ

എൽ.പി. സ്കൂൾ അധ്യാപക റാങ്ക് ഹോൾഡർമാരുടെ സമരത്തെക്കുറിച്ചുള്ള മുഖ്യമന്ത്രിയുടെ മറുപടിയും പഴയ സതീശനെയും പുതിയ സതീശനെയും തുറന്നുകാട്ടുന്നു. ഒഴിവില്ലാത്തതിനാലാണ് നിയമനം നൽകാത്തതെന്നാണ് ഇപ്പോഴത്തെ വിശദീകരണം. എന്നാൽ റാങ്ക് പട്ടിക നീട്ടണമെന്നും നിയമനം വേഗത്തിലാക്കണമെന്നും ആവശ്യപ്പെട്ട് ഉദ്യോഗാർഥികൾ സെക്രട്ടറിയറ്റിനു മുന്നിൽ മണ്ണുവാരി തിന്നുന്ന പ്രതീകാത്മക സമരംവരെ നടത്തി. ചില ജില്ലകളിൽ റാങ്ക് പട്ടിക പ്രസിദ്ധീകരിച്ച് മാസങ്ങൾ കഴിഞ്ഞിട്ടും വളരെ കുറച്ച് നിയമനങ്ങൾ മാത്രമാണ് ഉണ്ടായതെന്ന പരാതിയും ഉയർന്നിരുന്നു.

പ്രതിപക്ഷത്തിരിക്കുമ്പോൾ സമരപ്പന്തലിലെത്തി അധികാരത്തിലെത്തിയാൽ 24 മണിക്കൂറിനകം പരിഹാരം കാണുമെന്ന് പറഞ്ഞുവെന്നാണ് ഉദ്യോഗാർഥികൾ ഓർമ്മിപ്പിക്കുന്നത്. അധികാരത്തിൽ എത്തിയപ്പോൾ ആ ആവേശം എവിടെപ്പോയി? പ്രതിപക്ഷത്തിരിക്കുമ്പോൾ ഓരോ റാങ്ക് ഹോൾഡറും സർക്കാരിന്റെ ക്രൂരതയുടെ ഇരയായിരുന്നു. അധികാരത്തിലെത്തിയപ്പോൾ അവർ ഒഴിവില്ലാത്ത ഒരു പട്ടികയിലെ പേരുകളായി മാറി. ഇതാണ് സതീശന്റെ രാഷ്ട്രീയം: അധികാരത്തിനു മുമ്പ് വാഗ്ദാനം; അധികാരത്തിനുശേഷം കണക്കിന്റെ കളി.

പി.എം. ശ്രീയിൽ അർധസത്യമോ അസത്യമോ?

പി.എം. ശ്രീ പദ്ധതിയിൽനിന്ന് കേരളത്തിന് ഇനി പിന്മാറാനാകില്ലെന്നാണ് മുഖ്യമന്ത്രി പറയുന്നത്. മുൻ എൽ.ഡി.എഫ്. സർക്കാർ ധാരണാപത്രം ഒപ്പിട്ടതിനാൽ തന്റെ കൈകൾ ബന്ധിക്കപ്പെട്ടുവെന്നാണ് വാദം.

കേരളം 2025 ഒക്ടോബർ 23ന് ധാരണാപത്രം ഒപ്പിട്ടിട്ടുണ്ട്. അത് മറച്ചുവെയ്ക്കേണ്ട കാര്യമല്ല. എന്നാൽ 2026 ഫെബ്രുവരിയിൽ കേന്ദ്ര വിദ്യാഭ്യാസ മന്ത്രാലയം പാർലമെന്റിൽ നൽകിയ മറുപടി പ്രകാരം, കേരളത്തിലെ പി.എം. ശ്രീ സ്കൂളുകളുടെ തിരഞ്ഞെടുപ്പ് ചലഞ്ച് മോഡിലൂടെ നടത്താനുണ്ടായിരുന്നു. സ്കൂളുകളുടെ വിവരങ്ങൾ പോർട്ടലിൽ അപ്‌ലോഡ് ചെയ്യാൻ കേന്ദ്രം സംസ്ഥാനത്തോട് ആവശ്യപ്പെട്ടിരിക്കുകയുമായിരുന്നു. അതായത് പദ്ധതി നടപ്പാക്കലിന്റെ നിർണായക ഘട്ടങ്ങൾ പൂർത്തിയായിരുന്നില്ല.

കേന്ദ്രം കേരളത്തിന് നൽകിയ 92.41 കോടി രൂപ പി.എം. ശ്രീ ഫണ്ടല്ല. 2025–26ലെ സമഗ്രശിക്ഷാ പദ്ധതിയുടെ ആദ്യ ഗഡുവാണ്. പാർലമെന്റ് മറുപടി അത് വ്യക്തമായി പറയുന്നു.

പി.എം. ശ്രീയിൽ ചേരുന്നത് ആർ.എസ്.എസ്. വിദ്യാഭ്യാസ അജൻഡയ്ക്കുള്ള വഴിയാണെന്ന് പ്രതിപക്ഷത്തിരുന്നപ്പോൾ പറഞ്ഞ കോൺഗ്രസ്, അധികാരത്തിലെത്തിയപ്പോൾ പദ്ധതിയുമായി മുന്നോട്ടുപോകുകയാണ്. 2025ൽ സതീശൻ തന്നെ പി.എം. ശ്രീയിൽനിന്ന് പിന്മാറാത്തത് ആരെ ഭയന്നിട്ടാണെന്ന് അന്നത്തെ മുഖ്യമന്ത്രിയോട് ചോദിച്ചിരുന്നു. ഇന്ന് അതേ ചോദ്യം സതീശനോടാണ്: പിന്മാറ്റം ആവശ്യപ്പെട്ട് കേന്ദ്രത്തെ സമീപിച്ചോ? ധാരണാപത്രത്തിലെ വ്യവസ്ഥകൾ പുനഃപരിശോധിക്കാൻ ശ്രമിച്ചോ? നിയമോപദേശം തേടിയോ? കേരളത്തിന്റെ പാഠ്യപദ്ധതി സ്വാതന്ത്ര്യം സംരക്ഷിക്കാൻ എന്തു ഉറപ്പാണ് നേടിയെടുത്തത്?

ഒന്നും ചെയ്യാതെ “മുൻ സർക്കാർ ഒപ്പിട്ടു, അതുകൊണ്ട് മുന്നോട്ടുപോകുന്നു” എന്നു പറയുന്നത് ഭരണനേതൃത്വമല്ല. അത് രാഷ്ട്രീയ ഉത്തരവാദിത്വത്തിൽനിന്നുള്ള ഒളിച്ചോട്ടമാണ്.

വാർത്താസമ്മേളനം മതിയാകില്ല

വി.ഡി.സതീശൻ പ്രതിപക്ഷ നേതാവായിരുന്നപ്പോൾ വാക്കുകൾക്ക് ക്ഷാമമുണ്ടായിരുന്നില്ല. എല്ലാ വിഷയത്തിലും കടുത്ത ചോദ്യങ്ങൾ ചോദിച്ചു. ചെറിയ സംശയത്തെയും വലിയ അഴിമതിയായി അവതരിപ്പിച്ചു. സർക്കാരിന്റെ ഓരോ യാത്രയും ഓരോ ചെലവും ഓരോ തീരുമാനവും വിചാരണ ചെയ്തു. ഇന്ന് അദ്ദേഹം മുഖ്യമന്ത്രിയാണ്. ഇപ്പോൾ ചോദ്യം ചോദിക്കേണ്ടത് മാധ്യമങ്ങളും ജനങ്ങളുമാണ്. മറുപടി പറയേണ്ടത് സതീശനാണ്.

എന്നാൽ അദ്ദേഹം ഇപ്പോഴും പ്രതിപക്ഷനേതാവിന്റെ കസേരയിലിരിക്കുന്നതുപോലെയാണ് പെരുമാറുന്നത്. ചോദ്യം ചോദിച്ചാൽ മറുചോദ്യം. വിമർശിച്ചാൽ പരിഹാസം. പരാജയം ചൂണ്ടിക്കാട്ടിയാൽ പിണറായി വിജയന്റെ പേര്.

ഹെലികോപ്ടർ യാത്രയുടെ ഔദ്യോഗിക രേഖ ചോദിച്ചാൽ നിക്ഷേപവിരുദ്ധരാണോ എന്ന് ചോദിക്കുന്നു. ദുരന്തകാലത്തെ പരിപാടികൾ ചോദിച്ചാൽ ഭക്ഷണം കഴിക്കരുതോ എന്ന് ചോദിക്കുന്നു. റാങ്ക് ഹോൾഡർമാരെക്കുറിച്ച് ചോദിച്ചാൽ ഒഴിവില്ലെന്ന് പറയുന്നു. പി.എം. ശ്രീയെക്കുറിച്ച് ചോദിച്ചാൽ പഴയ ധാരണാപത്രത്തിനു പിന്നിൽ ഒളിക്കുന്നു. ഇത് മലർത്തിയടിക്കൽ അല്ല. ഇത് മറുപടി പറയാൻ കഴിയാത്ത ഒരു മുഖ്യമന്ത്രിയുടെ വെപ്രാളമാണ്.

ജനങ്ങളെ സൈബർ ക്യാപ്സ്യൂളുകൾകൊണ്ട് എന്നും കബളിപ്പിക്കാനാവില്ല. വാർത്താസമ്മേളനത്തിലെ ശബ്ദവും ശരീരഭാഷയും പരിഹാസവും കുറച്ചുനേരം കൈയടി നേടിത്തരാം. എന്നാൽ ഭരണത്തിന്റെ പരീക്ഷ നടക്കുന്നത് ക്യാമറയ്ക്കു മുന്നിലല്ല. ദുരന്തഭൂമിയിലാണ്. സെക്രട്ടറിയറ്റിനു മുന്നിൽ സമരം ചെയ്യുന്ന ഉദ്യോഗാർഥിയുടെ കണ്ണീരിലാണ്. പൊതുഖജനാവിലെ ഓരോ രൂപയിലും. കേരളത്തിന്റെ വിദ്യാഭ്യാസ സ്വാതന്ത്ര്യത്തിലും. അവിടെ മറുചോദ്യങ്ങൾക്കു വിലയില്ല. വ്യക്തമായ ഉത്തരവും ഉത്തരവാദിത്വമുള്ള പ്രവൃത്തിയുമാണ് വേണ്ടത്.

“വിമർശകരെ മലർത്തിയടിച്ചു” എന്ന ക്യാപ്സ്യൂൾ ഇറക്കാം. പക്ഷേ ജനങ്ങളുടെ ചോദ്യം അവിടെത്തന്നെ നിൽക്കും: മുഖ്യമന്ത്രി, മറുപടി എവിടെ?