Follow the FOURTH PILLAR LIVE channel on WhatsApp
മലയാളികളുടെ ഏറ്റവും വലിയ ആഘോഷമായ ഓണം സിനിമാ സെറ്റുകളിലും പലപ്പോഴും വേറിട്ടൊരു അനുഭവമാണ്. ഓണക്കാലത്ത് ചിത്രീകരണം നടക്കുന്ന സിനിമകൾ പലതും യൂണിറ്റ് അംഗങ്ങൾക്ക് കുടുംബത്തോടൊപ്പം ആഘോഷിക്കാനായി ഇടവേള നൽകാറുണ്ട്. എന്നാൽ ഇത്തവണ ചില പ്രമുഖ ചിത്രങ്ങൾ ഓണദിവസങ്ങളിലും ചിത്രീകരണം തുടർന്നു. കാരക്കുടിയിൽ മമ്മൂട്ടി നായകനാകുന്ന ചിത്രവും ഊട്ടിയിൽ ടൊവിനോ തോമസ് നായകനാകുന്ന ‘മുൻപേ’യും കുട്ടിക്കാനം–വാഗമൺ മേഖലകളിൽ ജയസൂര്യ നായകനാകുന്ന ‘മായൻ’ എന്ന ചിത്രവും അതിലുണ്ട്.
ചിത്രീകരണം മുടക്കാതെ മുന്നോട്ടുപോയെങ്കിലും ഓണത്തിന്റെ നിറവും സന്തോഷവും കൈവിടാൻ ‘മായൻ’ സംഘം തയ്യാറായില്ല. അങ്ങനെ വാഗമണ്ണിലെ ചിത്രീകരണത്തിനിടയിൽ തന്നെ സിനിമാസംഘം ഒരുമിച്ച് ഓണം ആഘോഷിച്ചു. ഓഗസ്റ്റ് 28ന് വാഗമണ്ണിലെ ഒരു കൺവെൻഷൻ സെന്ററിലായിരുന്നു ‘മായൻ’ സംഘത്തിന്റെ ഓണാഘോഷം. ചിത്രത്തിലെ അഭിനേതാക്കളും സാങ്കേതികപ്രവർത്തകരും മറ്റു യൂണിറ്റ് അംഗങ്ങളും ഉൾപ്പെടെ 150ഓളം പേർ ഒത്തുകൂടിയപ്പോൾ സിനിമാസെറ്റ് തന്നെ വലിയൊരു കുടുംബമായി മാറി. മാജിക് മൂണിന്റെ ബാനറിൽ രാജീവ് ഗോവിന്ദൻ നിർമിക്കുന്ന ‘മായൻ’ സംവിധാനം ചെയ്യുന്നത് ‘കളങ്കാവൽ’ എന്ന ചിത്രത്തിലൂടെ ശ്രദ്ധേയനായ ജിതിൻ കെ.ജോസാണ്.
ജയസൂര്യ, വിജയ് ബാബു, നൈല ഉഷ, ആർഷ ബൈജു, ജിബിൻ ഗോപിനാഥ്, വൈഷ്ണവി തുടങ്ങിയ അഭിനേതാക്കൾ ആഘോഷത്തിൽ പങ്കെടുത്തു. ഇടുക്കി എം.പി. ഡീൻ കുര്യാക്കോസും പ്രത്യേകാതിഥിയായി എത്തിയതോടെ ചടങ്ങിന് കൂടുതൽ നിറമായി. പൊതുപ്രവർത്തകനെന്ന നിലയിൽ നിരവധി ഓണാഘോഷങ്ങളിൽ പങ്കെടുത്തിട്ടുണ്ടെങ്കിലും ഒരു സിനിമാസംഘത്തിനൊപ്പം ഓണം ആഘോഷിക്കുന്നത് ആദ്യമായാണെന്ന് ഡീൻ കുര്യാക്കോസ് പറഞ്ഞു. വാഗമണ്ണിലും പരിസരപ്രദേശങ്ങളിലും നടക്കുന്ന ചിത്രീകരണത്തിന് ജനപ്രതിനിധിയെന്ന നിലയിൽ എല്ലാ സഹകരണവും നൽകുമെന്നും ‘മായൻ’ മികച്ച വിജയം നേടട്ടെയെന്നും അദ്ദേഹം ആശംസിച്ചു.
ഓണാഘോഷത്തിന്റെ സന്തോഷത്തിനൊപ്പം അതിന്റെ സാംസ്കാരിക അർഥവും ഓർമിപ്പിച്ചായിരുന്നു ജയസൂര്യയുടെ വാക്കുകൾ. നമ്മിൽനിന്ന് പതിയെ നഷ്ടപ്പെട്ടുപോകുന്ന പാരമ്പര്യങ്ങളെ ഇത്തരം കൂട്ടായ്മകളിലൂടെ തിരിച്ചുപിടിക്കാൻ കഴിയട്ടെയെന്ന് അദ്ദേഹം പറഞ്ഞു. ഒരുമയും പങ്കുവയ്ക്കലുമാണ് ഓണത്തിന്റെ ആത്മാവെന്നും അതാണ് ഇത്തരം ആഘോഷങ്ങളെ മനോഹരമാക്കുന്നതെന്നും ജയസൂര്യ ഓർമിപ്പിച്ചു. സ്വന്തമായി നിർമിക്കുന്ന ‘കാലന്റെ തങ്കക്കുടം’ എന്ന ചിത്രത്തിന്റെ ജോലികൾ ഓണത്തലേന്ന് പൂർത്തിയാക്കിയ ശേഷമാണ് ജയസൂര്യ ‘മായൻ’ സെറ്റിലെത്തിയത്.
ഇത്തരം ഒത്തുചേരലുകൾ മനുഷ്യബന്ധങ്ങളുടെ പ്രാധാന്യം കൂടുതൽ ഓർമിപ്പിക്കുന്നതാണെന്ന് വിജയ് ബാബു പറഞ്ഞു. തിരക്കേറിയ സിനിമാജീവിതത്തിനിടയിൽ ഒരു കൂട്ടം ആളുകൾ ഒരേ മനസ്സോടെ ആഘോഷത്തിനായി ചേരുന്നത് തന്നെ വലിയ സന്തോഷമാണെന്നും അദ്ദേഹം അഭിപ്രായപ്പെട്ടു.
കഴിഞ്ഞ കുറേ വർഷങ്ങളായി നാട്ടിൽ ഓണം ആഘോഷിക്കാൻ അവസരം ലഭിച്ചിരുന്നില്ലെന്നും ഇത്തവണ അതിന് കഴിഞ്ഞതിൽ ഏറെ സന്തോഷമുണ്ടെന്നും നൈല ഉഷ പറഞ്ഞു. പ്രവാസജീവിതവും തുടർച്ചയായ സിനിമാ തിരക്കുകളും കാരണം പല താരങ്ങൾക്കും നാട്ടിലെ ഓണം അപൂർവമാകാറുണ്ട്. അതുകൊണ്ടുതന്നെ വാഗമണ്ണിലെ ഈ ആഘോഷം നൈലയ്ക്ക് വ്യക്തിപരമായും സന്തോഷകരമായ നിമിഷമായി.
സംവിധായകൻ ജിതിൻ കെ. ജോസ് ചടങ്ങിൽ സ്വാഗതം പറഞ്ഞു. നിർമാതാവ് രാജീവ് ഗോവിന്ദൻ നന്ദി രേഖപ്പെടുത്തി. വലിയ വേദിയോ നീണ്ട ഔപചാരികതകളോ ഇല്ലാതെ കുറച്ചുനേരം മാത്രം നീണ്ടുനിന്ന ആഘോഷമായിരുന്നു അത്. എന്നാൽ സിനിമയുടെ തിരക്കിനിടയിൽ ഒത്തുചേർന്ന ആ മനുഷ്യർക്ക് ഓർത്തുവെയ്ക്കാൻ ഒരുപിടി നല്ല നിമിഷങ്ങൾ സമ്മാനിച്ചാണ് ചടങ്ങ് അവസാനിച്ചത്.
സിനിമ എന്നത് ക്യാമറയ്ക്കുമുന്നിലുള്ള താരങ്ങളുടെ മാത്രം ലോകമല്ല. 100 കണക്കിന് മനുഷ്യരുടെ അധ്വാനവും കൂട്ടായ്മയും ചേർന്നാണ് ഒരു ചിത്രം പിറക്കുന്നത്. ആ ബന്ധങ്ങൾക്ക് കൂടുതൽ ഊഷ്മളത നൽകുന്ന അവസരമായി ‘മായൻ’ സെറ്റിലെ ഓണാഘോഷം മാറി.
ഒരു സിനിമ പൂർത്തിയാകുമ്പോൾ പ്രേക്ഷകൻ കാണുന്നത് തിരശ്ശീലയിലെ കഥയാണ്. പക്ഷേ അതിനു പിന്നിൽ മറ്റൊരു കഥയുണ്ട്—ഒരുമിച്ച് യാത്രചെയ്യുന്നവരുടെ, ഭക്ഷണം പങ്കിടുന്നവരുടെ, കാത്തിരിക്കുന്നവരുടെ, അധ്വാനിക്കുന്നവരുടെ കഥ.
