Follow the FOURTH PILLAR LIVE channel on WhatsApp
തിരുവനന്തപുരം: പേട്ട ഡിവിഷണൽ റെയിൽവേ ആശുപത്രിക്ക് എൻട്രി ലെവൽ എൻ.എ.ബി.എച്ച്. സർട്ടിഫിക്കേഷൻ ലഭിച്ചു. ദക്ഷിണ റെയിൽവേയുടെ മെഡിക്കൽ വിഭാഗത്തിൻ്റെ ചരിത്രത്തിലെ ഒരു നാഴികക്കല്ലാണിത്. അഭിമാനകരമായ അക്രഡിറ്റേഷൻ ലഭിക്കുന്ന രാജ്യത്തെ ആദ്യത്തെ ഡിവിഷണൽ റെയിൽവേ ആശുപത്രിയാണ് തിരുവനന്തപുരത്തേത്.
അക്രഡിറ്റേഷൻ പ്രക്രിയയുടെ ഭാഗമായി വൻകിട ആശുപത്രികളുടേതിനു തുല്യമായി അടിസ്ഥാന സൗകര്യങ്ങളിൽ വളരെയധികം പുരോഗതി ഈ ആശുപത്രി കൈവരിച്ചു. ജനറൽ സർജറി, ജനറൽ മെഡിസിൻ, ഓർത്തോപീഡിക്സ്, ഒഫ്താൽമോളജി, ഇ.എൻ.ടി., ഒബ്സ്റ്റട്രിക്സ് ആൻഡ് ഗൈനക്കോളജി, പീഡിയാട്രിക്സ്, ഡെന്റൽ എന്നീ മേഖലകളിലെ സ്പെഷ്യലിസ്റ്റുകൾ വീട്ടിൽ തന്നെ ലഭ്യമാണ്. കാർഡിയോളജി, ന്യൂറോളജി, യൂറോളജി, ഗ്യാസ്ട്രോഎൻട്രോളജി, സൈക്യാട്രി, ഓർത്തോപീഡിക്സ്, ഡെർമറ്റോളജി, പൾമണോളജി, റേഡിയോളജി എന്നീ മേഖലകളിലെ വിസിറ്റിങ് കൺസൾട്ടന്റുമാരും ലഭ്യമാണ്.
ഇവിടെ അൾട്രാ-സോണോഗ്രാം, എക്കോ കാർഡിയോഗ്രാഫ്, ഡോപ്ലർ എന്നിവ പതിവായി നടക്കുന്നുണ്ട്. അതുപോലെ എല്ലാ പ്രധാന ശസ്ത്രക്രിയകളും സൂപ്പർ സ്പെഷ്യാലിറ്റി ശസ്ത്രക്രിയകളും മെഡിക്കൽ കൺസൾട്ടേഷനും നടക്കുന്നു. ഡിവിഷണൽ ആശുപത്രിയിൽ എല്ലാ വൈദ്യശാസ്ത്ര മേഖലകളിലും സമഗ്ര ആരോഗ്യ പരിരക്ഷ നൽകുക എന്നതാണ് ലക്ഷ്യം.
തിരുവനന്തപുരം ഡിവിഷണൽ റെയിൽവേ ആശുപത്രിയിൽ നടന്ന ചടങ്ങിൽ റെയിൽവേ ഹെൽത്ത് സർവീസസിൻ്റെയും റെയിൽവേ ബോർഡിൻ്റെയും ഡയറക്ടർ ജനറൽ ഡോ.മാൻ സിങ് എൻ.എ.ബി.എച്ച്. സർട്ടിഫിക്കറ്റ് ഔദ്യോഗികമായി കൈമാറി. റെയിൽവേ ബോർഡിലെ ആരോഗ്യ വിഭാഗം പ്രിൻസിപ്പൽ എക്സിക്യൂട്ടീവ് ഡയറക്ടർ ഡോ.എം.രവീന്ദ്രൻ, തിരുവനന്തപുരം റെിൽവേ ഡിവിഷണൽ മാനേജർ ഡോ.മനീഷ് ധപ്ല്യാല്‍, ഡോ.സി.എം.രവി, ഡോ.എസ്.കല്യാണി, എം.ആർ.വിജി , ഡോ.എസ്.ശോഭ ജാസ്മിൻ തുടങ്ങിയവർ സന്നിഹിതരായിരുന്നു.
