ആരോഗ്യ വകുപ്പ് കൈകാര്യം ചെയ്യുന്നത് ലാഘവത്തോടെ; മുരളീധരനെതിരെ മുൻ ആരോഗ്യ മന്ത്രിമാർ

യു.ഡി.എഫ്. സർക്കാർ അധികാരത്തിലെത്തിയതിനു പിന്നാലെ സംസ്ഥാനത്തിന്റെ ആരോഗ്യസംവിധാനത്തിൽ ആശങ്കാജനകമായ മാറ്റങ്ങളാണ് സംഭവിക്കുന്നതെന്ന് മുൻ ആരോഗ്യമന്ത്രിമാരായ പി.കെ.ശ്രീമതി, കെ.കെ.ശൈലജ, വീണ ജോർജ് എന്നിവർ ആരോപിച്ചു. ആരോഗ്യവകുപ്പിനെ ഗൗരവത്തോടെ സമീപിക്കേണ്ടതിന് പകരം നിസ്സാരവത്കരിക്കുന്ന സമീപനമാണ് മന്ത്രി കെ.മുരളീധരന്റേതെന്നും ഇത് തുടരുന്നത് സംസ്ഥാനത്തിന്റെ പൊതുജനാരോഗ്യ മേഖലയെ ദുർബലപ്പെടുത്തുമെന്നും അവർ വാർത്താസമ്മേളനത്തിൽ പറഞ്ഞു.

ആരോഗ്യവകുപ്പ് മറ്റേതൊരു ഭരണവകുപ്പിനെയും പോലെ ലാഘവത്തോടെ കൈകാര്യം ചെയ്യാവുന്നതല്ലെന്ന് പി.കെ.ശ്രീമതി പറഞ്ഞു. ജീവൻരക്ഷാ മരുന്നുകളുടെ ലഭ്യതയിലും ചികിത്സാസൗകര്യങ്ങളിലും പ്രശ്നങ്ങൾ ഉയരുമ്പോൾ സർക്കാർ കൂടുതൽ ഉത്തരവാദിത്തത്തോടെ ഇടപെടേണ്ടതുണ്ട്. എന്നാൽ നിലവിൽ അതിന് വിരുദ്ധമായ സമീപനമാണ് കാണുന്നതെന്നും അവർ കുറ്റപ്പെടുത്തി.

സ്പൈനൽ മസ്‌കുലർ അട്രോഫി (എസ്.എം.എ.) ബാധിച്ച കുട്ടികൾക്ക് ‘ക്ലിനിക്കൽ ട്രയൽ ഒൺലി’ എന്ന് രേഖപ്പെടുത്തിയ മരുന്ന് നൽകിയ സംഭവവും അവർ ചൂണ്ടിക്കാട്ടി. പരീക്ഷണഘട്ടത്തിലുള്ള മരുന്നുകൾ ഉപയോഗിക്കുമ്പോൾ കർശനമായ വൈദ്യശാസ്ത്ര മാനദണ്ഡങ്ങളും സുരക്ഷാ നടപടികളും പാലിക്കേണ്ടതുണ്ട്. പുതിയ മരുന്നിനെക്കുറിച്ചുള്ള വിവരങ്ങളും അതിന്റെ സ്വഭാവവും രക്ഷിതാക്കളെ പൂർണമായി ബോധ്യപ്പെടുത്തേണ്ടതുണ്ടെന്നും ഈ വിഷയത്തിൽ രക്ഷിതാക്കൾക്കുണ്ടായ ആശങ്ക ഗൗരവമായി കാണണമെന്നും ശ്രീമതി ആവശ്യപ്പെട്ടു.

മുൻ എൽ.ഡി.എഫ്. സർക്കാരുകൾ പൊതുജനാരോഗ്യരംഗത്ത് സ്വീകരിച്ച സമീപനം ഇതിൽനിന്ന് വ്യത്യസ്തമായിരുന്നുവെന്നും അവർ പറഞ്ഞു. സൗജന്യ മരുന്നുവിതരണം ഉറപ്പാക്കുന്നതിനും പൊതുആശുപത്രികളിലെ ചികിത്സാസൗകര്യങ്ങൾ മെച്ചപ്പെടുത്തുന്നതിനും സർക്കാർ ഇടപെട്ടിരുന്നു. കഴിഞ്ഞ 10 വർഷത്തിനിടെ മരുന്നുക്ഷാമം വലിയ പൊതുപ്രശ്നമായി മാറാത്തവിധം വിതരണസംവിധാനം പ്രവർത്തിപ്പിക്കാനായെന്നും അവർ അവകാശപ്പെട്ടു.

കേരള മെഡിക്കൽ സർവീസസ് കോർപ്പറേഷൻ 2007 ഡിസംബറിൽ രൂപവത്കരിച്ചതിനു പിന്നിലെ പ്രധാന ലക്ഷ്യങ്ങളിലൊന്ന് മരുന്നുവാങ്ങൽ നടപടികളെ സുതാര്യവും ഭരണപരമായി സ്വതന്ത്രവുമാക്കുകയായിരുന്നുവെന്നും ശ്രീമതി ചൂണ്ടിക്കാട്ടി. കോർപ്പറേഷന്റെ നടപടിക്രമപ്രകാരം മരുന്നുകളുടെ ടെൻഡർ, വാങ്ങൽ എന്നിവയിൽ മന്ത്രിക്ക് നേരിട്ടുള്ള പങ്കില്ല. ആരോഗ്യ പ്രിൻസിപ്പൽ സെക്രട്ടറി ഉൾപ്പെടെയുള്ള ഉദ്യോഗസ്ഥ സംവിധാനമാണ് നടപടികൾ കൈകാര്യം ചെയ്യേണ്ടത്. മരുന്ന് കമ്പനികളുടെ പ്രതിനിധികളുമായോ മേധാവികളുമായോ മന്ത്രിതല ഇടപെടൽ ഒഴിവാക്കണമെന്ന നിലപാടും നേരത്തെ സ്വീകരിച്ചിരുന്നുവെന്ന് അവർ പറഞ്ഞു.

എന്നാൽ എസ്.എം.എ. ചികിത്സയ്ക്കുള്ള മരുന്നുമായി ബന്ധപ്പെട്ട കമ്പനി മേധാവിയുമായി ആരോഗ്യമന്ത്രി കൂടിക്കാഴ്ച നടത്തിയെന്നും പിന്നാലെ കമ്പനിയുമായി കരാറിലേക്ക് നീങ്ങിയെന്നും മുൻ മന്ത്രിമാർ ആരോപിച്ചു. തുടർന്ന് ക്ലിനിക്കൽ ട്രയലുമായി ബന്ധപ്പെട്ട മരുന്ന് കുട്ടികൾക്ക് നൽകിയതിനെക്കുറിച്ചും വിശദമായ പരിശോധന വേണമെന്നും അവർ ആവശ്യപ്പെട്ടു.

ആരോഗ്യവകുപ്പിലെ വാങ്ങൽനടപടികളും മരുന്നുവിതരണവും കർശനമായ മാനദണ്ഡങ്ങൾ പാലിച്ചായിരിക്കണം നടക്കേണ്ടതെന്ന് മുൻ മന്ത്രിമാർ പറഞ്ഞു. എന്നാൽ യു.ഡി.എഫ്. ഭരണത്തിൽ ഈ ചട്ടങ്ങൾ പാലിക്കപ്പെടുന്നുണ്ടോയെന്ന സംശയം ഉയരുന്ന സാഹചര്യങ്ങളാണുള്ളതെന്നും അവർ ആരോപിച്ചു.

ആരോഗ്യരംഗത്തെ ഓരോ തീരുമാനവും മനുഷ്യജീവനുമായി നേരിട്ട് ബന്ധപ്പെട്ടതാണ്. അതുകൊണ്ടുതന്നെ “ഇതൊക്കെ നിസ്സാരം” എന്ന തരത്തിലുള്ള സമീപനം ഈ വകുപ്പിൽ അനുവദിക്കാനാകില്ലെന്ന് പി.കെ.ശ്രീമതി പറഞ്ഞു. ആരോഗ്യവകുപ്പ് കൈകാര്യം ചെയ്യുന്നതിൽ മന്ത്രി കെ.മുരളീധരൻ വേണ്ടത്ര ഉത്തരവാദിത്തവും ജാഗ്രതയും പുലർത്തുന്നില്ലെന്നും, നിലവിലെ രീതിയിൽ അദ്ദേഹം ആരോഗ്യവകുപ്പ് മന്ത്രിസ്ഥാനത്ത് തുടരുന്നത് ഉചിതമല്ലെന്നുമായിരുന്നു മുൻ മന്ത്രിമാരുടെ വിമർശനം.