‘ഗൂഗിൾബുക്ക്’ വരുന്നു

Follow the FOURTH PILLAR LIVE channel on WhatsApp 

മൊബൈൽ ഫോണുകളുടെ ലോകം കീഴടക്കിയ ആൻഡ്രോയ്ഡ് ഇനി ലാപ്ടോപ്പുകളിലേക്കും പുതിയ രൂപത്തിൽ കടക്കുകയാണ്. ‘ഗൂഗിൾബുക്ക്’ എന്ന പുതിയ ലാപ്ടോപ് ശ്രേണിയിലൂടെ കംപ്യൂട്ടർ വിപണിയിൽ വലിയൊരു മാറ്റത്തിനാണ് ഗൂഗിൾ ഒരുങ്ങുന്നത്. സെപ്റ്റംബർ 15ന് ന്യൂയോർക്കിൽ നടക്കുന്ന പ്രത്യേക മാധ്യമ പ്രദർശനത്തിൽ ആദ്യ ഗൂഗിൾബുക്ക് ഉപകരണങ്ങളുടെ വിശദമായ രൂപവും പ്രവർത്തനവും അവതരിപ്പിക്കാനാണ് കമ്പനി തയ്യാറെടുക്കുന്നത്.

ഇത് മറ്റൊരു ലാപ്ടോപ് പുറത്തിറക്കൽ മാത്രമല്ല. ക്രോം പ്രവർത്തകത്തിന്റെ വെബ് അധിഷ്ഠിത കംപ്യൂട്ടിങ് അനുഭവവും ആൻഡ്രോയ്ഡിന്റെ വിപുലമായ ആപ്ലിക്കേഷൻ ലോകവും ഒരൊറ്റ കംപ്യൂട്ടർ സംവിധാനത്തിലേക്ക് കൂട്ടിക്കൊണ്ടുവരാനുള്ള ഗൂഗിളിന്റെ ഏറ്റവും വലിയ ശ്രമമാണിത്. അതോടൊപ്പം ഗൂഗിളിന്റെ നിർമിതബുദ്ധി സംവിധാനമായ ജെമിനിയെയും ലാപ്ടോപ്പിന്റെ അടിസ്ഥാന പ്രവർത്തനത്തിന്റെ ഭാഗമാക്കുകയാണ്.

ക്രോംബുക്കിന് 15 വർഷം; ഇനി പുതിയ വഴി

ഏകദേശം 15 വർഷം മുമ്പാണ് ഗൂഗിൾ ക്രോംബുക്ക് അവതരിപ്പിച്ചത്. ഇന്റർനെറ്റ് കേന്ദ്രീകരിച്ച ലളിതമായ കംപ്യൂട്ടറായിരുന്നു അതിന്റെ അടിസ്ഥാന ആശയം. കുറഞ്ഞ വിലയും ലളിതമായ പ്രവർത്തനവും സുരക്ഷയും കാരണം വിദ്യാലയങ്ങളിലും സാധാരണ കംപ്യൂട്ടിങ് ആവശ്യങ്ങൾക്കും ക്രോംബുക്ക് വലിയ വിപണി കണ്ടെത്തി. പക്ഷേ ഗൂഗിൾബുക്ക് അതേ വഴിയിലൂടെ വരുന്ന മറ്റൊരു കുറഞ്ഞവില കംപ്യൂട്ടറല്ല. ഉയർന്ന നിലവാരമുള്ള ലാപ്ടോപ്പുകളുടെ വിപണിയെയാണ് ഗൂഗിൾ ഇത്തവണ ലക്ഷ്യമിടുന്നത്.

മെയ് 12ന് ഗൂഗിൾ ആദ്യമായി ഗൂഗിൾബുക്ക് പ്രഖ്യാപിക്കുമ്പോൾ തന്നെ അതിനെ ജെമിനി നിർമിതബുദ്ധിയെ അടിസ്ഥാനമാക്കി ആദ്യംമുതൽ രൂപകല്പന ചെയ്ത പുതിയ ലാപ്ടോപ് വിഭാഗമെന്നാണ് വിശേഷിപ്പിച്ചത്. ആൻഡ്രോയ്ഡിലെ ശക്തമായ ആപ്ലിക്കേഷനുകളും ക്രോമിന്റെ വെബ് അനുഭവവും ഒരുമിപ്പിക്കുകയാണ് ലക്ഷ്യം. അതുകൊണ്ടുതന്നെ ആപ്പിളിന്റെ മാക്ബുക്കിനും ഉയർന്ന നിലവാരമുള്ള വിൻഡോസ് ലാപ്ടോപ്പുകൾക്കുമെതിരെ ഗൂഗിളിന്റെ പുതിയ വെല്ലുവിളിയായാണ് ഗൂഗിൾബുക്കിനെ സാങ്കേതികലോകം കാണുന്നത്.

ആൻഡ്രോയ്ഡ് ഇനി ഫോണിൽ ഒതുങ്ങില്ല

ഗൂഗിൾബുക്കിന്റെ ഏറ്റവും വലിയ പ്രത്യേകത അതിന്റെ അടിത്തറ ആൻഡ്രോയ്ഡ് സാങ്കേതികവിദ്യയാണ് എന്നതാണ്. ഇന്ന് ലോകത്ത് കോടിക്കണക്കിന് ആളുകൾ ഉപയോഗിക്കുന്ന ആൻഡ്രോയ്ഡ് ആപ്ലിക്കേഷനുകളുടെ വലിയ ശേഖരം ഗൂഗിളിനുണ്ട്. ഫോണിൽ ഉപയോഗിക്കുന്ന ആപ്ലിക്കേഷനുകളും സേവനങ്ങളും കംപ്യൂട്ടറിലേക്ക് കൂടുതൽ സ്വാഭാവികമായി എത്തിക്കാൻ ഇതിലൂടെ സാധിക്കും.

ഗൂഗിളിന്റെ ലക്ഷ്യം വളരെ വ്യക്തമാണ്: ഫോൺ ഒരു ലോകവും ലാപ്ടോപ് മറ്റൊരു ലോകവുമായി തുടരേണ്ടതില്ല. ആൻഡ്രോയ്ഡ് ഫോണിലെ ആപ്ലിക്കേഷനുകളും ഫയലുകളും ലാപ്ടോപ്പിൽ എളുപ്പത്തിൽ ഉപയോഗിക്കാനും 2 ഉപകരണങ്ങൾക്കിടയിൽ തടസ്സമില്ലാതെ മാറിനിൽക്കാനും കഴിയുന്ന സംവിധാനമാണ് ഗൂഗിൾ മുന്നോട്ടുവയ്ക്കുന്നത്.

ഒരു ഫോണിൽ തുടങ്ങിയ ജോലി ലാപ്ടോപ്പിൽ തുടരുക, ഫോൺ ഫയലുകൾ ഉടൻ കംപ്യൂട്ടറിൽ തുറക്കുക, ആൻഡ്രോയ്ഡ് ആപ്ലിക്കേഷനുകൾ വലിയ സ്ക്രീനിൽ ഉപയോഗിക്കുക തുടങ്ങിയ കാര്യങ്ങൾ കൂടുതൽ സ്വാഭാവികമാകുമെന്നാണ് പ്രതീക്ഷ. മാക്ബുക്കും ഐഫോണും തമ്മിൽ സംയോജിപ്പിച്ച് വിപണി പിടിച്ചെടുത്ത ആപ്പിളിന്റെ രീതി പിന്തുടരുകയല്ലേ എന്ന സംശയമുയരുക സ്വാഭാവികം.

പേര് എന്തായിരിക്കും?

ഗൂഗിൾബുക്കിനെ പ്രവർത്തിപ്പിക്കുന്ന പുതിയ പ്രവർത്തകത്തിന്റെ ഔദ്യോഗിക പേര് ഇതുവരെ ഗൂഗിൾ പുറത്തുവിട്ടിട്ടില്ല. വികസനഘട്ടത്തിലെ രേഖകളിലും സാങ്കേതിക സൂചനകളിലും ഇത് ‘അലുമിനിയം ഒ.എസ്.’ എന്ന പേരിലാണ് അറിയപ്പെട്ടിരുന്നത്. എന്നാൽ അത് ഔദ്യോഗിക വിപണിനാമമല്ലെന്ന് ഗൂഗിൾ വ്യക്തമാക്കിയിട്ടുണ്ട്. സെപ്റ്റംബർ 15ലെ പരിപാടിയിൽ പുതിയ പ്രവർത്തകത്തിന്റെ ഔദ്യോഗിക പേര് വെളിപ്പെടുത്തുമെന്നാണ് അറിയിച്ചിട്ടുള്ളത്. ക്രോം പ്രവർത്തകത്തിന്റെ വെബ് കേന്ദ്രീകൃത സൗകര്യങ്ങളും ആൻഡ്രോയ്ഡിന്റെ അടിസ്ഥാന സാങ്കേതിക ഘടനയും എങ്ങനെ ഒരുമിപ്പിച്ചിരിക്കുന്നു എന്നതിന്റെ കൂടുതൽ വിവരങ്ങളും അന്ന് പുറത്തുവരും.

ജെമിനി വെറുമൊരു ആപ്ലിക്കേഷനല്ല

ഗൂഗിൾബുക്കിനെ മറ്റുള്ള ലാപ്ടോപ്പുകളിൽനിന്ന് വേറിട്ടുനിർത്താൻ ഗൂഗിൾ ഏറ്റവും കൂടുതൽ ആശ്രയിക്കുന്നത് ജെമിനിയെയാണ്. ഇവിടെ നിർമിതബുദ്ധി പിന്നീട് ചേർത്ത ഒരു സൗകര്യമല്ല. ലാപ്ടോപ് ആദ്യംമുതൽ ജെമിനിയെ മനസ്സിൽവച്ചാണ് രൂപകല്പന ചെയ്തിരിക്കുന്നതെന്നാണ് ഗൂഗിളിന്റെ വാദം. അതിന്റെ ഉദാഹരണമാണ് ‘മാജിക് പോയിന്റർ’.

സാധാരണ കംപ്യൂട്ടറിൽ മൗസ് സൂചിക ഒരു വസ്തുവിൽ ക്ലിക്ക് ചെയ്യാനുള്ള ഉപകരണം മാത്രമാണ്. ഗൂഗിൾബുക്കിൽ അതിനോട് ജെമിനിയുടെ ബുദ്ധി ചേർക്കുകയാണ്. സ്ക്രീനിലെ ഒരു വാചകത്തിലോ ചിത്രത്തിലോ വിവരത്തിലോ സൂചിക കൊണ്ടുചെന്നാൽ അതുമായി ബന്ധപ്പെട്ട കാര്യങ്ങൾ മനസ്സിലാക്കി ആവശ്യമായ നിർദേശങ്ങൾ നൽകാൻ ജെമിനിക്ക് കഴിയുമെന്നാണ് ഗൂഗിൾ പറയുന്നത്. കംപ്യൂട്ടറിലെ ഏറ്റവും പഴയ ഉപകരണങ്ങളിലൊന്നായ മൗസ് സൂചികയെ പോലും നിർമിതബുദ്ധിയുടെ സഹായത്തോടെ മാറ്റിപ്പണിയുകയാണ് ലക്ഷ്യം.

സ്വന്തം ആവശ്യത്തിന് സ്വന്തം ചെറുസംവിധാനങ്ങൾ

ഗൂഗിൾബുക്കിൽ ജെമിനിയോട് പറഞ്ഞ് ഉപയോക്താവിന് സ്വന്തം ആവശ്യത്തിനനുസരിച്ചുള്ള ചെറു വിവരജാലകങ്ങൾ സൃഷ്ടിക്കാനും കഴിയും. ഉദാഹരണത്തിന് ജോലി, കലണ്ടർ, യാത്ര, സന്ദേശങ്ങൾ, കാലാവസ്ഥ, ചെയ്യാനുള്ള കാര്യങ്ങൾ തുടങ്ങിയവ ഒരുമിച്ച് കാണിക്കുന്ന വ്യക്തിഗത വിവരപ്പലക വേണമെങ്കിൽ അതിനായി പ്രത്യേകം സാങ്കേതിക പരിജ്ഞാനം വേണ്ടിവരില്ല. ജെമിനിയോട് ആവശ്യപ്പെട്ടാൽ അതിന് അനുയോജ്യമായ സംവിധാനം സൃഷ്ടിക്കാമെന്നാണ് ഗൂഗിളിന്റെ വാഗ്ദാനം. കംപ്യൂട്ടർ ഉപയോക്താവിന്റെ നിർദേശങ്ങൾ അനുസരിച്ച് സ്വയം ക്രമീകരിക്കപ്പെടുന്ന രീതിയിലേക്കുള്ള മാറ്റത്തിന്റെ സൂചനയാണിത്.

ഗൂഗിൾ ഒറ്റയ്ക്കല്ല; 5 വമ്പൻ കമ്പനികൾ കൂടെ

ഗൂഗിൾ നേരിട്ട് ഒരു ഗൂഗിൾബുക്ക് നിർമിച്ച് വിപണിയിലെത്തിക്കുക എന്നതല്ല ഇപ്പോഴത്തെ പദ്ധതി. പകരം 5 പ്രമുഖ കംപ്യൂട്ടർ നിർമാതാക്കളാണ് ആദ്യഘട്ടത്തിൽ ഗൂഗിളിനൊപ്പം ചേരുന്നത്. ഏസർ, അസൂസ്, ഡെൽ, എച്ച്.പി., ലെനോവോ എന്നിവയാണ് ആദ്യ പങ്കാളികൾ. വ്യത്യസ്ത വലിപ്പത്തിലും രൂപത്തിലും ഗൂഗിൾബുക്കുകൾ ഇവർ പുറത്തിറക്കും.

അതുകൊണ്ട് ഗൂഗിൾബുക്ക് എന്നത് ഒരു പ്രത്യേക കംപ്യൂട്ടറിന്റെ പേരിനേക്കാൾ പുതിയൊരു കംപ്യൂട്ടർ വിഭാഗത്തിന്റെ പേരാണ്. വിൻഡോസ് പ്രവർത്തിക്കുന്ന ലാപ്ടോപ്പുകൾ പല കമ്പനികൾ നിർമിക്കുന്നതുപോലെ ഗൂഗിൾബുക്കുകളും വിവിധ കമ്പനികളിൽനിന്ന് ലഭിക്കും.

ശ്രദ്ധയാകർഷിച്ച് പ്രകാശപ്പട്ട

പുറത്തുവന്ന ചില ചിത്രങ്ങളിലും ഗൂഗിളിന്റെ ആദ്യ അവതരണത്തിലും ഗൂഗിൾബുക്കുകളുടെ രൂപകല്പനയിലെ ശ്രദ്ധേയ ഘടകമായി ഒരു പ്രകാശപ്പട്ട കാണാം. ലാപ്ടോപ്പിന്റെ പുറംഭാഗത്തിലൂടെ നീളുന്ന ഈ പ്രകാശസംവിധാനം ഉപകരണത്തിന് വ്യത്യസ്തമായൊരു രൂപം നൽകുന്നു. ആദ്യഘട്ട ഗൂഗിൾബുക്കുകളുടെ പൊതുവായ രൂപകല്പനാ അടയാളങ്ങളിലൊന്നായി ഇത് മാറിയേക്കാം. എന്നാൽ അലങ്കാരത്തിനപ്പുറം ഇതിന് എന്തെല്ലാം പ്രവർത്തനങ്ങൾ ഉണ്ടായിരിക്കുമെന്നതിൽ കൂടുതൽ വ്യക്തത സെപ്റ്റംബർ പരിപാടിയിലാണ് പ്രതീക്ഷിക്കുന്നത്.

സെപ്റ്റംബർ 15ന് എന്തൊക്കെ അറിയാം?

ന്യൂയോർക്കിലെ പരിപാടിയിൽ ഗൂഗിളിന്റെ മുതിർന്ന ഉദ്യോഗസ്ഥർ പുതിയ കംപ്യൂട്ടർ സംവിധാനത്തിന്റെ സാങ്കേതിക അടിത്തറ വിശദീകരിക്കുമെന്നാണ് ക്ഷണം ലഭിച്ച മാധ്യമങ്ങൾ റിപ്പോർട്ട് ചെയ്യുന്നത്. ഗൂഗിൾബുക്കിനുവേണ്ടി ഒരുക്കിയ പ്രവർത്തകം, ജെമിനി സൗകര്യങ്ങൾ, ആൻഡ്രോയ്ഡുമായുള്ള ബന്ധം തുടങ്ങിയവ വിശദീകരിക്കപ്പെടും.

പങ്കാളി കമ്പനികളുടെ ആദ്യ ഉപകരണങ്ങളും അവിടെ പ്രദർശിപ്പിക്കും. മാധ്യമപ്രവർത്തകർക്ക് അവ നേരിട്ട് ഉപയോഗിക്കാനും ചിത്രങ്ങളും ദൃശ്യങ്ങളും പകർത്താനും പ്രവർത്തനക്ഷമത പരിശോധിക്കാനും അവസരമുണ്ടാകും. അതേസമയം ഇത് പൊതുജനങ്ങൾക്കായുള്ള വലിയ തത്സമയ വിപണിയിറക്കൽ ചടങ്ങായിരിക്കില്ലെന്നാണ് പുതിയ വിവരം. മാധ്യമങ്ങൾക്കായി അടച്ചിട്ട രീതിയിലുള്ള മുൻകൂർ പ്രദർശനമായിരിക്കും. അതിനുശേഷമായിരിക്കും ഉപകരണങ്ങളുടെ വിശദാംശങ്ങൾ ഘട്ടംഘട്ടമായി പുറത്തുവരിക.

ക്രോംബുക്കുകൾ അവസാനിക്കുമോ?

ഗൂഗിൾബുക്ക് വന്നാൽ നിലവിലെ ക്രോംബുക്കുകൾ ഇല്ലാതാകുമോ എന്നതാണ് സ്വാഭാവികമായ ചോദ്യം. ഇപ്പോൾ ലഭിക്കുന്ന ഉത്തരം — ഇല്ല. ഗൂഗിൾബുക്ക് ക്രോംബുക്കിന്റെ നേരിട്ടുള്ള പകരക്കാരനാണെന്ന് ഗൂഗിൾ പറഞ്ഞിട്ടില്ല. കുറഞ്ഞ ചെലവിൽ വെബ് ഉപയോഗം, വിദ്യാഭ്യാസം, സാധാരണ ഓഫീസ് ആവശ്യങ്ങൾ എന്നിവ ലക്ഷ്യമിട്ട ക്രോംബുക്ക് വിഭാഗം തുടരാനാണ് സാധ്യത.

ഗൂഗിൾബുക്ക് മറ്റൊരു വിപണിയെയാണ് ലക്ഷ്യമിടുന്നത് — കൂടുതൽ ശക്തിയുള്ള, ഉയർന്ന നിലവാരമുള്ള, നിർമിതബുദ്ധി കേന്ദ്രീകരിച്ച കംപ്യൂട്ടറുകൾ തേടുന്നവരെ. അതായത് ഗൂഗിളിന്റെ ലാപ്ടോപ് ലോകം ഇനി രണ്ട് തലങ്ങളിലാകാം. സാധാരണ ആവശ്യങ്ങൾക്ക് ക്രോംബുക്ക്; കൂടുതൽ ശക്തമായ കംപ്യൂട്ടിങ്ങിന് ഗൂഗിൾബുക്ക്.

മാക്കിനും വിൻഡോസിനും പുതിയ എതിരാളിയോ?

ഗൂഗിൾബുക്കിന്റെ യഥാർഥ പരീക്ഷണം ഇവിടെയാണ്. ആപ്പിളിന് മാക്ബുക്കും സ്വന്തം പ്രവർത്തകവുമുണ്ട്. മൈക്രോസോഫ്റ്റിന്റെ വിൻഡോസ് വിവിധ കമ്പനികളുടെ ലാപ്ടോപ്പുകളിൽ ആധിപത്യം പുലർത്തുന്നു.

ഗൂഗിളിന് ലോകത്തിലെ ഏറ്റവും വലിയ മൊബൈൽ പ്രവർത്തകങ്ങളിലൊന്നായ ആൻഡ്രോയ്ഡും ക്രോം ബ്രൗസറും വലിയ ആപ്ലിക്കേഷൻ ശേഖരവുമുണ്ട്. എന്നാൽ ഉയർന്ന നിലവാരമുള്ള വ്യക്തിഗത കംപ്യൂട്ടർ വിപണിയിൽ അതേ ആധിപത്യം നേടാൻ ഇതുവരെ കഴിഞ്ഞിട്ടില്ല. ഗൂഗിൾബുക്ക് ആ വിടവ് നികത്താനുള്ള ശ്രമമാണ്.

ആൻഡ്രോയ്ഡ് ആപ്ലിക്കേഷനുകൾ വലിയ സ്ക്രീനിൽ യഥാർഥ കംപ്യൂട്ടർ നിലവാരത്തിൽ പ്രവർത്തിക്കുകയും ജെമിനി ദൈനംദിന ജോലികളുടെ ഭാഗമായി മാറുകയും ശക്തമായ പ്രൊഫഷണൽ ആപ്ലിക്കേഷനുകൾ ലഭ്യമാവുകയും ചെയ്താൽ മാക്ബുക്കിനും വിൻഡോസ് ലാപ്ടോപ്പുകൾക്കും ഗൗരവമുള്ള പുതിയ എതിരാളിയാകാൻ ഗൂഗിൾബുക്കിന് കഴിയും. എന്നാൽ അതിന് സാങ്കേതിക മികവ് മാത്രം പോരാ. വിലയും നിർണായകമാണ്.

ഇന്ത്യയിൽ എപ്പോഴെത്തും?

ആദ്യ ഗൂഗിൾബുക്കുകൾ 2026ലെ ശരത്കാലത്ത് വിപണിയിലെത്തുമെന്നാണ് ഗൂഗിൾ അറിയിച്ചിരിക്കുന്നത്. എന്നാൽ ഏത് രാജ്യത്താണ് ആദ്യം വില്പന തുടങ്ങുക, ഓരോ മോഡലിന്റെയും വില എത്രയായിരിക്കും തുടങ്ങിയ കാര്യങ്ങൾ ഇതുവരെ പുറത്തുവിട്ടിട്ടില്ല. ഇന്ത്യയിൽ എപ്പോൾ ലഭിക്കുമെന്ന കാര്യത്തിലും ഔദ്യോഗിക സ്ഥിരീകരണമില്ല.

ഗൂഗിൾബുക്ക് ഉയർന്ന നിലവാരമുള്ള വിഭാഗത്തിലാണ് വരുന്നതെന്നതിനാൽ പഴയ ക്രോംബുക്കുകളുടെ വില പ്രതീക്ഷിക്കേണ്ടതില്ല. മാക്ബുക്ക് എയർ ഉൾപ്പെടെയുള്ള ഉയർന്ന നിലവാരമുള്ള ലാപ്ടോപ്പുകളുമായി മത്സരിക്കുന്ന വിലനിലവാരത്തിലായിരിക്കാം ആദ്യ ഉപകരണങ്ങൾ എത്തുകയെന്നാണ് സാങ്കേതികലോകത്തെ വിലയിരുത്തൽ. എന്നാൽ ഗൂഗിൾ വില പ്രഖ്യാപിക്കുന്നതുവരെ അത് അനുമാനം മാത്രമാണ്.

ഫോൺ–കംപ്യൂട്ടർ അതിർത്തി മായുമോ?

ഗൂഗിൾബുക്കിന്റെ പ്രസക്തി പുതിയൊരു ലാപ്ടോപ് വിപണിയിലെത്തുന്നു എന്നതിലല്ല. ഫോണും കംപ്യൂട്ടറും രണ്ടുതരം സാങ്കേതിക ലോകങ്ങളായി തുടരേണ്ടതുണ്ടോ എന്ന ചോദ്യമാണ് ഗൂഗിൾ ഉയർത്തുന്നത്. ഫോണിൽ ആൻഡ്രോയ്ഡ്. കംപ്യൂട്ടറിൽ ആൻഡ്രോയ്ഡിനെ അടിസ്ഥാനമാക്കിയ പുതിയ പ്രവർത്തകം. രണ്ടിലും ഒരേ ആപ്ലിക്കേഷനുകൾ. രണ്ടിനുമിടയിൽ എളുപ്പത്തിൽ കൈമാറാവുന്ന ഫയലുകൾ. അതിനുമുകളിൽ ഉപയോക്താവിനെ മനസ്സിലാക്കി സഹായിക്കുന്ന ജെമിനി. ഗൂഗിളിന്റെ ഈ സ്വപ്നം യാഥാർഥ്യമായാൽ വ്യക്തിഗത കംപ്യൂട്ടിങ്ങിലെ വലിയൊരു മാറ്റത്തിന്റെ തുടക്കമായേക്കാം ഗൂഗിൾബുക്ക്.

ക്രോംബുക്ക് വന്നപ്പോൾ ഗൂഗിൾ ചോദിച്ചത്, “എല്ലാ ജോലിക്കും വലിയൊരു പരമ്പരാഗത കംപ്യൂട്ടർ സംവിധാനം ആവശ്യമുണ്ടോ?” എന്നായിരുന്നു. 15 വർഷത്തിനുശേഷം ഗൂഗിൾബുക്ക് വരുന്നത് ഫോണിൽ ലോകം കീഴടക്കിയ ആൻഡ്രോയ്ഡിന് ഇനി നമ്മുടെ ലാപ്ടോപ്പും കൈയടക്കാനാകുമോ എന്ന ചോദ്യവുമായാണ്. സെപ്റ്റംബർ 15ന് ന്യൂയോർക്കിൽ അതിന്റെ വ്യക്തമായ ഉത്തരം ലഭിച്ചുതുടങ്ങും.