Follow the FOURTH PILLAR LIVE channel on WhatsApp
ന്യൂഡൽഹി: പാകിസ്താൻ രഹസ്യാന്വേഷണ ഏജൻസിയായ ഇൻ്റർ-സർവീസസ് ഇൻ്റലിജൻസുമായി (ഐ.എസ്.ഐ.) ബന്ധമുണ്ടെന്ന് സംശയിക്കുന്ന 9 പേരെ ഡൽഹി പൊലീസിൻ്റെ സ്പെഷൽ സെൽ അറസ്റ്റ് ചെയ്തു. ഇവരിൽ നിന്ന് വൻതോതിൽ ആയുധങ്ങളും സ്ഫോടകവസ്തുക്കളും പിടിച്ചെടുത്തു. ഡൽഹിയിലെ പ്രധാനപ്പെട്ട സ്ഥാപനങ്ങളെയും സുരക്ഷാ ഉദ്യോഗസ്ഥരെയും ആക്രമിക്കാൻ ഇവർ ലക്ഷ്യമിട്ടിരുന്നെന്നാണ് റിപ്പോർട്ടുകൾ.
അറസ്റ്റിലായവർക്ക് അധോലോക കുറ്റവാളി ദാവൂദ് ഇബ്രാഹിമുമായി ബന്ധമുണ്ടെന്നും സംശയമുണ്ട്. അറസ്റ്റിലായ പ്രതികൾ ഡൽഹി, മുംബൈ, പഞ്ചാബ് എന്നിവിടങ്ങളിൽ നിന്നുള്ളവരാണ്. ഇതിൽ ചിലർ വിദേശ പൗരരുമാണ്. ആണവ നിലയങ്ങൾ, വിമാനത്താവളങ്ങൾ, റെയിൽവേ സ്റ്റേഷനുകൾ, പവർ പ്ലാൻ്റുകൾ എന്നിവ ആക്രമിക്കുക ലക്ഷ്യമായിരുന്നു.
കുറച്ച് ദിവസങ്ങളായി രഹസ്യാന്വേഷണ വിഭാഗം അറസ്റ്റിലായവരെ നിരീക്ഷിക്കുന്നുണ്ടെന്നും കൃത്യമായ അന്വേഷണത്തിന് ശേഷമാണ് 9 പേരെയും അറസ്റ്റ് ചെയ്തതെന്നും പൊലീസ് അറിയിച്ചു. കൂടുതൽ പേർ സംഘത്തിലുണ്ടോ എന്നത് സംബന്ധിച്ചും കണ്ടെത്തിയ ആയുധങ്ങളുടെ ഉറവിടം കണ്ടെത്തുന്നതിനുമുള്ള അന്വേഷണം നടക്കുകയാണെന്ന് പൊലീസ് വൃത്തങ്ങൾ അറിയിച്ചു.
