Follow the FOURTH PILLAR LIVE channel on WhatsApp
തിരുവനന്തപുരം: അനധികൃത സ്വത്തുസമ്പാദനക്കേസില് എ.ഡി.ജി.പി. എം.ആര്.അജിത് കുമാറിന് ക്ലീന് ചിറ്റ് നല്കിയ വിജിലന്സ് അന്വേഷണ റിപ്പോര്ട്ട് കോടതിയില് സമര്പ്പിച്ചു. കേസ് ഈ മാസം 27ന് പരിഗണിക്കും. അന്വേഷണ റിപ്പോര്ട്ട് ഹാജരാക്കണമെന്ന് പ്രത്യേക വിജിലന്സ് കോടതി കഴിഞ്ഞ ദിവസം അന്ത്യശാസനം നല്കിയിരുന്നു.
റിപ്പോര്ട്ട് സര്ക്കാരിന് സമര്പ്പിച്ചെന്ന് അന്വേഷണ ഉദ്യോഗസ്ഥന് വ്യക്തമാക്കിയപ്പോള് കേസ് നിലനില്ക്കുന്നത് കോടതിയില് അല്ലേ എന്നും റിപ്പോര്ട്ട് ഇവിടെയല്ലേ ഹാജരാക്കേണ്ടതെന്നും ജഡ്ജി എം.വി.രാജകുമാര ചോദിച്ചിരുന്നു. ഇതേത്തുടര്ന്നാണ് തി്ങ്കളാഴ്ച റിപ്പോര്ട്ട് കോടതിയില് ഹാജരാക്കിയത്. റിപ്പോര്ട്ട് പരിശോധിച്ച് കോടതി തുടര്നടപടി സ്വീകരിക്കും.
അജിത് കുമാറിനെ കുറ്റവിമുക്തനാക്കിയ വിജിലന്സ് അന്വേഷണ റിപ്പോര്ട്ട് സര്ക്കാര് അംഗീകരിച്ചിരുന്നു. കഴിഞ്ഞ മാസമാണ് മുഖ്യമന്ത്രി വിജിലന്സിൻ്റെ അന്വേഷണ റിപ്പോര്ട്ട് അംഗീകരിച്ച് ഒപ്പിട്ടത്. അനധികൃത സ്വത്ത് സമ്പാദനകേസില് വിജിലന്സ് പ്രത്യേക യൂണിറ്റ് നടത്തിയ അന്വേഷണത്തില് അജിത് കുമാര് കുറ്റക്കാരനല്ലെന്നു കണ്ടെത്തിയിരുന്നു.
എം.ആര്.അജിത് കുമാര് ഭാര്യാ സഹോദരനുമായി ചേര്ന്ന് സെൻ്റിന് 70 ലക്ഷം രൂപ വിലയുളള ഭൂമി തിരുവനന്തപുരം കവടിയാറില് വാങ്ങി ആഡംബര കെട്ടിടം നിര്മിക്കുന്നതില് അഴിമതിപ്പണം ഉണ്ടെന്നായിരുന്നു ആരോപണം.
